कौटुंबिक वादातून पतीने केली पत्नीची हत्या!

Akola Crime News संगीताचा मृत्यू झाल्याने पती प्रशांतने स्वत:ला अकोट फैल पोलिसांच्या स्वाधीन केल्याची माहिती सूत्रांनी दिली.

ठळक मुद्देसंगीता प्रशांत इंगळे ही तिच्या दोन मुलांसह अकोट फैल परिसरात राहत होती.पती प्रशांत इंगळे हा रोजगारासाठी नाशिक येथे राहत आहे. रागाच्या भरात प्रशांतने पत्नी संगीतावर चाकूने हल्ला करत तिला ठार केले.

अकोला: कौटुंबिक वादातून पतीने पत्नीची चाकू भोसकून हत्या केल्याची धक्कादायक घटना गुरुवारी रात्री आपातापा रोडवरील दमाणी रुग्णालय परिसरात घडली. संगीता प्रशांत इंगळे असं मृत महिलेचं नाव आहे. या घटनेमुळे परिसरात एकच खळबळ उडाली असून, आरोपी पतीने स्वत:ला अकोट फैल पोलिसांच्या स्वाधीन केल्याची माहिती सूत्रांनी दिली. प्राप्त माहितीनुसार, मृत महिला संगीता प्रशांत इंगळे ही सहा वर्षांपासून तिच्या दोन मुलांसह अकोट फैल परिसरात राहत होती. पती प्रशांत इंगळे हा रोजगारासाठी नाशिक येथे राहत असून, त्याचे आईवडील आपातापा रोड स्थित एकता नगर परिसरात वास्तव्यास आहेत. प्रशांत हा दिवाळीसाठी आईवडिलांकडे आला होता. दरम्यान, प्रशांत हा मोठ्या मुलाला आपल्या सोबत नाशिकला घेऊन जाणार होता; मात्र मुलाला पतीसोबत नाशिकला पाठविण्याचा विरोध करत तिने मुलाला मारण्यास सुरुवात केली. त्यामुळे पती- पत्नीमध्ये वाद झाला. रागाच्या भरात प्रशांतने पत्नी संगीतावर चाकूने हल्ला करत तिला ठार केले. पत्नी संगीताचा मृत्यू झाल्याने पती प्रशांतने स्वत:ला अकोट फैल पोलिसांच्या स्वाधीन केल्याची माहिती सूत्रांनी दिली. घटनेची माहिती मिळताच अकोटफैल पोलीस निरीक्षक महेंद्र कदम यांच्यासह पोलीस कर्मचाऱ्यांनी घटनास्थळाला भेट दिली. ही घटना सिव्हिल लाइन्स पोलीस ठाण्याच्या हद्दीत घडल्याने अकोट फैल पोलिसांनी घटनेची माहिती सिव्हिल लाइन्स पोलिसांना दिली. घटनेची माहिती मिळताच सिव्हिल लाइन्स पोलिसांनी घटनास्थळी धाव घेतली. पोलिसांनी घटनेचा पंचनामा केला असून, रात्री उशिरापर्यंत गुन्हा दाखल करण्याची प्रक्रिया सुरू होती.