Model Manvi Raj , Love Jihad : बिहारमधील एका मॉडेलने रांचीचा रहिवासी असलेल्या तनवीर अख्तरवर 'लव्ह जिहाद'चा आरोप केला आहे. मॉडेलचे म्हणणे आहे की, एका मॉडेलिंग इन्स्टिट्यूटचा डायरेक्टर तनवीर अख्तर खान याने तिला हिंदू असल्याचे सांगून फसवले आणि प्रेमाच्या जाळ्यात ओढले. बिहारमधील भागलपूर येथील रहिवासी असलेल्या मानवी राज या पीडित तरुणीने तनवीर उर्फ यश तिच्यावर धर्मांतर करण्यासाठी दबाव टाकत असल्याचा आरोप केला आहे. ती म्हणते की जेव्हा तिने 'द केरळ स्टोरी' हा चित्रपट पाहिला तेव्हा तिने धाडस केले आणि आपल्यावरील अन्यायाबाबत वाचा फोडण्याचा निर्णय घेतला.
मॉडेल मानवी राजच्या आरोपावरून मुंबईच्या वर्सोवा पोलीस ठाण्यात गुन्हा दाखल करण्यात आला आहे. मुंबई पोलिसांनी सांगितले की, एका मॉडेलने तनवीर अख्तर खानवर अत्याचाराचा आरोप केला आहे. या प्रकरणी गुन्हा दाखल करण्यात आला आहे. वर्सोवा पोलीस ठाण्यात आयपीसी कलम ३७६(२)(एन), ३२८, ५०६, ५०४, ३२३ आणि आयटी कायद्याच्या कलम ६७ अंतर्गत गुन्हा दाखल करण्यात आला आहे. सध्या हे प्रकरण रांची पोलिसांकडे वर्ग करण्यात आल्याचे अधिकाऱ्यांचे म्हणणे आहे.
काय म्हणाली पीडित मॉडेल?
तो (तनवीर अख्तर) माझ्यावर लग्न करून धर्मांतर करण्यासाठी दबाव टाकत होता, असे मानवीचे म्हणणे आहे. या सर्व गोष्टी 2020 मध्ये सुरू झाल्या, जेव्हा ती मॉडेलिंग एजन्सीमध्ये सामील झाली. ती पुढे सांगते की, सुरुवातीला त्याने तिला त्याचे नाव यश असल्याचे सांगितले, पण 4 महिन्यांनंतर त्याला तिचे सत्य समजले की त्याचे खरे नाव तनवीर अख्तर आहे.
पीडितेने पुढे सांगितले की, तो माझे फोटो माझ्या कुटुंबातील सदस्यांना पाठवत आहे आणि माझ्या सोशल मीडिया पोस्टवर कमेंट करत आहे. त्याने मुंबईत मला मारण्याचाही प्रयत्न केला. पण जेव्हा मी 'द केरळ स्टोरी' चित्रपट पाहिला तेव्हा मला धीर आला. मला या चित्रपटातून प्रेरणा आणि धैर्य मिळाले, त्यानंतर मी तक्रार दाखल केली.