नवी दिल्ली – राजधानी दिल्लीच्या सीमेला लागून असलेल्या गुरुग्राममध्ये एक धक्कादायक घटना घडली आहे. जी ऐकून तुमचंही ह्दय पिळवटून जाईल. याठिकाणी निवृत्त सैनिकाने अर्ध्या तासात ५ जणांची हत्या केली आहे. इतकचं नाही तर आरोपीनं लहान मुलांनाही सोडलं नाही. मुलांची देखभाल करणारं कुणी वाचलं नाही म्हणून चिमुकल्यांनाही मारून टाकलं असं त्यानं चौकशीत सांगितले. सध्या गुन्हेगार पोलिसांच्या तावडीत आहे. या प्रकरणी अधिक चौकशी केली जात आहे.
जानेवारीपासून षडयंत्र रचलं
मिळालेल्या माहितीनुसार, आरोपी राय सिंह यांनी जानेवारीमध्ये त्यांच्या सूनेला भाडेकरु कृष्णा तिवारीसोबत आक्षेपार्ह अवस्थेत पाहिलं. त्यानंतर त्याच्या मनात हा राग कायम राहिला. या दोघांमधील अनैतिक संबध यापुढेही सुरुच राहिले. घटनेच्या एक दिवस आधी आरोपीनं त्याच्या मुलाला खाटू श्यामजवळ पाठवलं होतं. मुलाला दुसरीकडे पाठवण्याचा कट हा षडयंत्राचाच भाग होता का? यावर पोलीस तपास करत आहेत.
अर्ध्या तासात ५ हत्या
रात्री साडे अकराच्या सुमारास आरोपीनं खुरपं आणि गवत कापायचा चाकू स्वत: जवळ ठेवला. घराच्या लाईट बंद केल्या. मध्यरात्री २ वाजता आरोपी सूनेच्या रुममध्ये पोहचला आणि दरवाजा ठोठावू लागला. दरवाजा उघडताच आरोपी राय सिंह त्याच्या सूनेच्या अंगावर गेला आणि अंगावर चाकूने सपासप वार केले. जोपर्यंत सूनेचा मृत्यू होत नाही तोवर आरोपीनं तिच्या शरीरावर वार सुरूच ठेवले.
सूनेला मारल्यानंतर आरोपी मध्यरात्री २.२० च्या सुमारास सिडी चढून भाडेकरू कृष्णा तिवारीच्या घरी पोहचला. कृष्णाने दरवाजा उघडला तेव्हा त्याच्यावरही चाकूने हल्ला केला. १० मिनिटांनी २.३० वाजता आरोपी कृष्णाची पत्नी अनामिका हिच्या रुममध्ये शिरला आणि चाकूने तिचीही हत्या केली. दोघांची हत्या केल्यानंतर आरोपीनं शेजारीच असलेल्या दोन्ही मुलांनाही क्रूरतेने मारून टाकलं. सून आणि भाडेकरूमध्ये अनैतिक संबंध असल्याच्या संशयावरुन आरोपीनं संतापाच्या भरात दोघांना मारलं. पण त्यांच्यासोबतच भाडेकरूची पत्नी अनामिका आणि तिच्या दोन मुलांनाही ठार केले. पोलीस चौकशीत लहान मुलांना का मारलं असं विचारला असता, त्यांचा सांभाळ कोण करणार म्हणून त्यांना मारुन टाकल्याचं आरोपीनं सांगितले.