फिनिक्स - एरिजोना इथं पाचवीच्या वर्गात शिकणाऱ्या ४ मुलींवर एका मुलाला मारून त्याच्या आत्महत्येचा बनाव रचल्याचा आरोप लागला आहे. ही घटना एरिजोनाच्या सरप्राइज येथे घडली आहे. मुलींनी शाळेच्या बाथरूममध्ये मुलाला चाकू मारण्याचे षडयंत्र रचले होते. या आरोपी मुलींना पोलिसांनी अटक केली. त्यांच्यावर धमकी देणे आणि खूनाचा प्रयत्न असा आरोप आहे. ब्रेकअपमुळे मुलींनी हे कृत्य केल्याचे बोलले जाते.
फिनिक्स उपनगर सरप्राइजमधील अधिकाऱ्यांनी सांगितले की, या मुलींनी त्यांच्या सहकारी मुलाला शाळेच्या बाथरूममध्ये बोलावून त्याच्या पोटात चाकू भोसकण्याचा कट रचला होता. या मुलींनी लंच आणि रिसेस काळात हा प्लॅन बनवला होता. ही घटना लेगेसी ट्रेडिशनल शाळेत मागील ऑक्टोबरमध्ये घडली. जेव्हा शाळेतील इतर मुलींनी या मुलींना षडयंत्र रचताना ऐकले तेव्हा त्याची माहिती शाळा प्रशासनाला दिली असं पोलीस रिपोर्टमध्ये सांगण्यात आले.
चौघा मुलींनी रचला कट
एका मुलीला शाळेत चाकू आणायचा होता. दुसरी मुलगी त्या चाकूने मुलावर हल्ला करणार होती. तिसरी मुलगी हल्ला करताना इतरांवर देखरेख ठेवणार होती तर चौथ्या मुलीने एक सुसाईड नोट लिहिली होती. ज्यामुळे या मुलाने आत्महत्या केली असावी असं पोलिसांना वाटेल. हे सर्व चौघींनी मिळून ठरवले होते. त्यात मुलगा आणि मुलीच्या ब्रेकअपवरून हे घडल्याचे सांगितले जाते. तपासात तीन मुलींनी गुन्हा कबुल केला तर चौथी मुलगी उडवाउडवीची उत्तरे देत होती. १०-११ वर्षाच्या मुलींना धमकी देणे आणि हत्येचा कट रचणे या आरोपाखाली अटक करण्यात आली आहे.
दरम्यान, मुलींची चौकशी केली तेव्हा तीन मुलींनी त्यांची चूक कबूल केली परंतु चौथी मुलगी हसत होती आणि बहाणे बनवू लागली. डॉक्टरांच्या मते या मुलींचे वय कमी आहे. त्यामुळे त्यांना या गोष्टीचे गांभीर्य समजू शकत नाही. शाळेतून या मुलींना काढून टाकण्यात आले आहे. सध्या या प्रकरणाची चौकशी सुरू आहे.