मुंबई - कोरोनाला रोखण्यासाठी लागू करण्यात आलेले निर्बंध झुगारून बँडस्टँडवर फिरत असलेल्या टायगर श्रॉफ (Tiger Shroff ) आणि दिशा पटानी (Disha Patani) यांना काल मुंबई पोलिसांनी रोखले होते. दरम्यान, कोरोनाकाळात नियमभंग करणे या दोघांना चांगलेच भोवले असून, कोविड-१९ संबंधीचे निर्बंध मोडल्याप्रकरणी त्यांच्याविरोधात मुंबई पोलिसांनी गुन्हा दाखल केला आहे. (An FIR has been registered against actors Tiger Shroff, Disha Patani & others for violating COVID-19 restrictions)
बॉलिवूड अभिनेता टायगर श्रॉफआणि अभिनेत्री दिशा पटानी अनेकदा एकत्र दिसून येत असतात. हे दोघेही डिनर डेट्स, ड्राइव्ह आणि पार्टीमध्ये एकत्र असतात. दरम्यान, काल मुंबईतील बँडस्टँड परिसरात ते कारमधून फिरत होते. त्यावेळी पोलिसांनी टायगर आणि दिशाला रोखले होते. त्यानंतर पोलिसांनी दोघांचेही आधारकार्ड तपासले. तसेच अन्य औपचारिकता पूर्ण केल्यानंतर त्यांना सोडून दिले होते. मुंबई पोलिसांनी केलेली ही कारवाई चर्चेचा विषय ठरली होती.
ई-टाइम्सने दिलेल्या वृत्तानुसार मंगळवारी संध्याकाळी दिशा पटानी आणि टायगर श्रॉफ हे जिममधून परतत होते. त्याचदरम्यान दोघेही फिरण्यासाठी मुंबईतील वांद्रे परिसरात असलेल्या बँडस्टँड येते पोहोचले. येथे ते कारमधून दुसरी फेरी मारत असतानाच पोलिसांनी अचानक त्यांना रोखले होते.
टायगर श्रॉफ आणि दिशा पटानी यांनी बागी-२ आणि बागी-३ या चित्रपटांमध्ये एकत्र काम केले आहे. त्याशिवाय एका म्युझिक व्हिडीओमध्येही ते एकत्र दिसले आहेत. तसेच हल्लीच ओटीटीवर प्रदर्शित झालेल्या सलमान खानच्या राधे या चित्रपटामध्येही दिशा दिसली होती.