लोकमत न्यूज नेटवर्क, बीड: मी महाराष्ट्र पोलिस बोलत असून, तुमच्या नावाने मनी लॉन्ड्रिंग आणि अतिरेक्यांना फंडिंग झाल्याची माहिती आहे, असे म्हणत व्हाॅट्सॲपला व्हिडीओ कॉल करून निवृत्त शिक्षिकेला डिजिटल अरेस्ट केली. त्यानंतर २१ ते २९ मे यादरम्यान तब्बल ८३ लाख रुपये ऑनलाइन हडप केले. याप्रकरणी सायबर पोलिस ठाण्यात गुन्हा दाखल झाला आहे.
पूजा (नाव बदलले, वय ६५, रा. अंबाजोगाई, जि. बीड) या निवृत्त शिक्षिका आहेत. २० मे रोजी त्यांना एका अनोळखी क्रमांकावरून कॉल आला. मी महाराष्ट्र पोलिस संजय पिसे बोलतो, असे त्याने सांगितले. नंतर हिंदी भाषेत तो म्हणाला, की तुमच्या आधार कार्डवरून दुसरे सीमकार्ड १६ एप्रिल रोजी घेतले आणि तुमच्या नावाने मनी लॉन्ड्रिंग व अतिरेक्यांना फंडिंग झाली आहे. तुम्ही तीन दिवसांत सर्व सहकार्य करा आणि आम्ही तुम्हाला यातून सोडवू. यासाठी आम्ही विश्वास नांगरे पाटील साहेब यांना स्पेशली विनंती केल्याचा विश्वास दिला. त्यानंतर मराठीतून बोलत व्हॉट्सॲपवर व्हिडीओ कॉल करून डिजिटल अरेस्ट करण्यात आले. खरे वाटावे म्हणून मुंबई पोलिसचे ऑफीस, झेंडे, लोगो पाठीमागे लावला. हे खरे असे समजून पूजा यांनी २१ मे रोजी पहिल्यांदा ३५ लाख १० हजार रुपये ऑनलाइन पाठविले.
पैसे पाठविल्यानंतर सायबर भामट्यांकडून नंबर ब्लॉक
पुढे त्यांनी २९ मेपर्यंत तब्बल ८३ लाख १ हजार ८१६ रुपये सायबर भामट्यांना पाठविले. त्यानंतर त्यांनी पूजा यांचा नंबर ब्लॉक केला. त्यावेळी त्यांना फसवणूक झाल्याचे लक्षात आले आणि सायबर पोलिस ठाणे गाठत फिर्याद दिली. त्यावरून शनिवारी गुन्हा दाखल झाला आहे.
प्लॉट गहाण ठेवून सावकाराकडून घेतले कर्ज
सायबर भामट्यांनी पूजा यांना भीती दाखवत तुमच्याकडे कोणती संपत्ती आहे, हे आम्हाला येथे दिसते. तुम्ही लपवून ठेवू नका, असे सांगितले. त्यानंतर पूजा यांनी प्लॉट गहाण ठेवून त्यावर खासगी सावकाराकडून १५ लाख रुपयांचे कर्ज घेतले. २९ मे रोजी हे सर्व पैसे भामट्यांना ऑनलाइन पाठविले.