दिल्लीत एक शिक्षिका ऑटोमध्ये बसून प्रवास करत असताना तिचा मोबाईल हिसकावून घेतल्याची भयंकर घटना समोर आली आहे. यावेळी शिक्षिकेच्या नाकाला फ्रॅक्चर आणि चेहऱ्यावर अनेक जखमा झाल्या आहेत. शिक्षिकेला दक्षिण दिल्लीतील साकेत येथील मॅक्स रुग्णालयात दाखल करण्यात आले आहे. योविका चौधरी असं तिचं नाव असून ती शाळेतून घरी जात असताना बाईकवरून आलेल्या दोघांनी तिचा आयफोन हिसकावण्याचा प्रयत्न केला.
देवली येथील रहिवासी असलेली योविका चौधरी ही शाळेनंतर घरी परतत असताना शुक्रवारी ही घटना घडली. याच दरम्यान, वाटेत दोन बाईकस्वारांनी तिचा आयफोन हिसकावण्याचा प्रयत्न केला. या झटापटीत योविका ऑटोतून खाली पडली आणि तिला काही अंतरापर्यंत फरफटत नेण्यात आलं. यानंतर चोरट्यांनी तिचा मोबाईल हिसकावून घेतला. या घटनेत योविकाच्या नाकाला फ्रॅक्चर होऊन अनेक ठिकाणी दुखापत झाली आहे. ती साकेत येथील ज्ञान भारती शाळेत शिक्षिका आहे.
योविकाने दिलेल्या माहितीनुसार, ती साकेत येथून ऑटो घेऊन तिच्या घरी निघाली. दरम्यान, स्प्लेंडर बाईकवरून आलेल्या दोन चोरट्यांनी खोखा मार्केटजवळ ऑटोच्या मागे येऊन तिचा आयफोन 13 हिसकावून नेला. आयफोन वाचवण्याच्या प्रयत्नात योविका ऑटोमधून खाली पडली आणि फरफटत गेली. यामुळे योविका जखमी झाली.
याप्रकरणी साकेत पोलीस ठाण्यात चोरट्यांविरुद्ध गुन्हा दाखल करण्यात आला आहे. पोलीस या प्रकरणाचा तपास करत असून आरोपींची ओळख पटवण्याचा प्रयत्न करत आहेत. मात्र, याप्रकरणी अद्याप कोणालाही अटक करण्यात आलेली नाही. ही घटना साकेत येथील खोखा मार्केटजवळील चॅरिटन हॉटेलजवळ घडली. एका हिंदी वेबसाईटने याबाबतचे वृत्त दिले आहे.