नवी दिल्लीत चोरी प्रकरणी एका जोडप्याला अटक करण्यात आली आहे. या जोडप्याकडून चोरीची बाईक जप्त करण्यात आली आहे. आरोपी टिकटॉक स्टार असल्याचं पोलिसांचं म्हणणं आहे. त्याची फेसबुकवर एका मुलीशी ओळख झाली, जिच्याशी त्याने लग्न केलं. यानंतर दोघांनी मिळून बाईक चोरण्यास सुरुवात केली.
मिळालेल्या माहितीनुसार, 14-15 ऑगस्टच्या मध्यरात्री बीएचडी नगर पोलीस ठाण्यात बाईक चोरीची तक्रार दाखल करण्यात आली होती. तक्रार मिळाल्यानंतर पोलिसांचे पथक घटनास्थळी पोहोचले आणि त्यांनी पाहणी केली. यासोबतच जवळपास लावण्यात आलेल्या सीसीटीव्ही फुटेजची तपासणी करण्यात आली.
सीसीटीव्हीमध्ये पाहिले असता बाईक एका जोडप्याने चोरल्याचे दिसून आले. यानंतर परिसरातील सीसीटीव्हीच्या आधारे आरोपींचा पाठलाग करण्यात आला. तपासाअंती आरोपींपैकी दीपक उर्फ सुक्खू याची ओळख पटली.
पोलिसांनी यानंतर तात्काळ ग्रेन मार्केट नजफगडजवळ पथक पाठवून सापळा रचून दोन्ही आरोपींना चोरीच्या बाईकसह पकडलं. पोलिसांनी दिलेल्या माहितीनुसार, दीपक राणा उर्फ सुक्खू आणि 25 वर्षीय प्रीती अशी आरोपींची नावे आहेत.
पोलिसांनी दिलेल्या माहितीनुसार, आरोपी दीपक हा टिकटॉक स्टार आहे. तो इन्स्टाग्रामवर व्हिडिओही अपलोड करायचा. फेसबुकच्या माध्यमातून तो प्रितीच्या संपर्कात आला. मैत्रीनंतर ते एकमेकांना भेटले आणि लग्न केलं. लग्नानंतर ते कुटुंबापासून वेगळे भाड्याच्या घरात राहत होते.
बाईक चोरीचे दोन्ही आरोपी हे व्यसनी असून त्यांच्या आर्थिक गरजा भागवण्यासाठी दोघेही एका कारखान्यात काम करू लागले, असे पोलिसांचे म्हणणे आहे. घटनेच्या दिवशी तो ड्रग्ज खरेदी करण्यासाठी नजफगडला पोहोचला होता. रात्री उशिरा तो रोहतकला जात असताना त्याने बाईक चोरली. एका हिंदी वेबसाईटने याबाबतचे वृत्त दिले आहे.