नवी दिल्ली - देशात अनेक धक्कादायक घटना समोर येत आहेत. अशीच एक भयंकर घटना समोर आली आहे. उत्तर प्रदेशमध्ये एका 22 वर्षीय तरुणीच्या मृत्यूप्रकरणी पोलिसांनी केलेल्या तपासात धक्कादायक खुलासा करण्यात आला आहे. तरुणीच्या मृत्यू प्रकरणाचं गूढ उकलण्यात पोलिसांना यश आलं आहे. लग्नासाठी दबाव आणल्याने बॉयफ्रेंडने तरुणीला विषारी इंजेक्शन दिल्याचं समोर आलं आहे. यामध्ये तिचा मृत्यू झाला. एका खासगी रुग्णालयात एकत्र नोकरी करत असताना दोघांचं प्रेमप्रकरण सुरू झालं होतं. पण तिने लग्नाचा तगादा लावल्याने तरुणाने तिचा काटा काढला.
मिळालेल्या माहितनुसार, आरोपी बॉयफ्रेंडला पोलिसांनी अटक केली आहे. पोलीस या हत्या प्रकरणाचा अधिक तपास करत आहेत. या घटनेने परिसरात एकच खळबळ उडाली आहे. उत्तर प्रदेशच्या अलिगढमध्ये हा भयंकर प्रकार घडला आहे. राहत्या घरी तरुणीचा मृतदेह संशयास्पद अवस्थेत आढळला होता. पोलिसांची फॉरेन्सिक टीम घटनास्थळी पोहोचली. तिथल्या काही गोष्टी ताब्यात घेण्यात आल्या आहेत. तसेच दोन सीरिंज देखील जप्त करण्यात आल्या.
घटनास्थळी एकापेक्षा जास्त व्यक्ती उपस्थित होत्या, असं पोलिसांच्या प्राथमिक तपासात आढळून आलं आहे. तरुणीच्या नातेवाईकांनी दिलेल्या माहितीनुसार, तिचे रिझवान नावाच्या तरुणासोबत प्रेमसंबंध सुरू होते. दोघंही एका खासगी रुग्णालयात काम करत होते. तरुणी लग्नासाठी रिझवानवर दबाव आणत होती. मात्र त्याला लग्न करायचं नव्हतं. त्यामुळे इंजेक्शनमध्ये विषारी पदार्थ मिसळून तिला टोचलं. त्यानंतर तिचा मृत्यू झाला असं सांगत आरोपीने आपला गुन्हा कबूल केला आहे. एका हिंदी वेबसाईटने याबाबतचे वृत्त दिले आहे.