नवी दिल्ली - देशात महिलांवरील अत्याचाराच्या आणि बलात्काराच्या घटनांमध्ये वाढ होत आहे. अशीच एक माणुसकीला काळीमा फासणारी घटना समोर आली आहे. राजस्थानमधील झुंझुनूच्या जिल्ह्यात सामूहिक बलात्काराची धक्कादायक घटना घडली आहे. सात नराधमांनी दोन सख्या बहिणींवर बलात्कार केला. आरोपी अनेक महिन्यांपासून दोन्ही बहिणींचे शोषण करत होते. त्या दोघींमधील धाकटी बहीण गरोदर राहिल्यानंतर हा संतापजनक प्रकार उघडकीस आला आहे. याप्रकरणी पीडितेच्या भावाने सात तरुणांविरोधात तक्रार दाखल केली आहे.
पोलिसांनी दिलेल्या माहितीनुसार, पीडितेच्या भावाने सांगितले की, मागील दीड वर्षांपासून हे आरोपी त्याच्या बहिणींसोबत दुष्कृत्य करत आहेत. आरोपींनी आधी मोठ्या बहिणीचा व्हिडीओ बनवला आणि जर याबाबत कुणाला सांगितले तर हा व्हिडीओ व्हायरल करण्यात येईल, अशी धमकी दिली. तसेच मोठ्या बहिणीवर दबाव टाकत म्हटले की, तुझ्या छोट्या बहिणीला बोलावले तर आम्ही तुला सोडून देऊ. या घटनेने परिसरात एकच खळबळ उडाली आहे.
आरोपींनी फेब्रुवारी 2021 मध्ये एका लग्नादरम्यान छोट्या बहिणीसोबत दुष्कृत्य केले. त्यावेळी ती अल्पवयीन होती. त्यानंतरही तिचे लैंगिक शोषण करण्यात आले. यामुळे ती गर्भवती राहिली. ही छोटी बहिण ही दहावीत आहे. मात्र, गरोदर असल्यामुळे तिला परीक्षेला बसता आले नाही. हा प्रकार कळताच आरोपी ढोलू खान याने तिला गर्भपाताची गोळी आणून दिली आणि कुणाला सांगितल्यास जीवे मारण्याची धमकी दिली.
23 एप्रिल रोजी लहान बहिणीच्या पोटात दुखू लागल्याने कुटुंबीयांना ही बाब कळाली. पोलिसांनी आरोपींविरुद्ध पॉक्सो कायदा आणि एससी-एसटी कायद्याच्या कलमांतर्गत गुन्हा दाखल करून तपास सुरू केला आहे. पोलिसांनी दोन्ही पीडित बहिणींचे मेडिकल केले आहे. या संपूर्ण प्रकरणाचा पोलीस तपास करत आहेत. तसेच कुटुंबीयांना यामुळे मोठा धक्का बसला आहे. एका हिंदी वेबसाईटने याबाबतचे वृत्त दिले आहे.