बीड : महाराष्ट्र गृहनिर्माण व क्षेत्रविकास प्राधिकरण विभागाची परीक्षा देण्यासाठी आलेल्या तोतया परीक्षार्थी अर्जुन बिघोत याला पोलिसांनी मंगळवारी सकाळी पकडले. वडझरी येथील राहुल किसन सानप या परीक्षार्थीच्या नावावर अर्जुन हा परीक्षा देणार होता. मात्र पोलिसांच्या सतर्कतेमुळे हा प्रयत्न फसला. या प्रकरणी आरोपीविरुद्ध फसवणुकीचा गुन्हा दाखल केला असून ५ फेब्रुवारीपर्यंत पोलीस कोठडी देण्यात आली.म्हाडाची परीक्षा मंगळवारी येथील दिशा संगणक केंद्रावर होती. या केंद्रावर राहुलऐवजी अर्जुन हा परीक्षा देणार होता. हॉलतिकीट तपासणीदरम्यान बंदोबस्तावरील पोलीस कर्मचारी संगीता शिरसाट व संजय राठोड यांना संशय आला. आपण सापडलो असल्याचे लक्षात येताच तोतया परीक्षार्थीने पळ काढला. पोलीस कर्मचाऱ्यांनी त्याचा पाठलाग करून पकडले.
Crime News: म्हाडाची परीक्षा देण्याआधीच तोतया परीक्षार्थी पकडला
By ऑनलाइन लोकमत | Updated: February 2, 2022 05:31 IST