धुळे - फोनवर बोलत पायी जात असलेल्या तरुणाच्या हातातून मोबाईल हिसकावून-दुचाकीवरून धूमस्टाईलने आलेल्या दोघांनी पोबारा केला. ही घटना शनिवारी रात्री सव्वाआठ वाजेच्या सुमारास देवपुरातील वाडीभोकर रोडवर घडली. याप्रकरणी पश्चिम देवपूर पोलीस ठाण्यात शनिवारी मध्यरात्री दोघांविरोधात जबरी चोरीचा गुन्हा दाखल करण्यात आला.
धुळे तालुक्यातील निकुंभे येथील तुषार प्रभाकर पारधी या शिक्षण घेणाऱ्या तरुणाने फिर्याद दाखल केली आहे. त्यानुसार, देवपुरातील वाडीभोकर रोडवरील स्वामी समर्थ पेट्रोल पंपाच्या जवळून शनिवारी रात्री सव्वाआठ वाजेच्या सुमारास तुषार पारधी हा फोनवर बोलत पायी जात होता. अंधाराचा फायदा घेऊन दोन तरुण दुचाकीवर धूमस्टाईलने वेगाने त्याच्याजवळ आले आणि दुचाकीवर मागे बसलेल्या एकाने हातातून बळजबरीने मोबाईल हिसकाविला आणि दोघांनी दुचाकीवरून पोबारा केला. आरडाओरड करूनही त्याचा काही उपयोग झाला नाही.
घटनेनंतर तुषार पारधी या तरुणाने पश्चिम देवपूर पोलीस ठाणे गाठत फिर्याद दाखल केली. त्यानुसार, शनिवारी मध्यरात्री बारा वाजेच्या सुमारास दोन तरुणाविरोधात भादंवि कलम ३९२, ३४ प्रमाणे गुन्ह्याची नोंद करण्यात आली. घटनेचा तपास सहायक पोलीस निरीक्षक सचिन बेंद्रे यांच्या मार्गदर्शनाखाली पोलीस उपनिरीक्षक डी. एन. चव्हाण करीत आहेत.