पाटणा - बिहारमधील छपरामध्ये एका महिलेसोबत झालेल्या छेडछाडीच्या घटनेचा धक्कादायक व्हिडीओ व्हायरल झाला आहे. या व्हिडिओमध्ये सदर महिला दुचाकीवर मागे बसली असून, काही लोक तिच्यासोबत गैरवर्तन करताना दिसत आहेत. काही लोक या महिलेच्या प्रायव्हेट पार्टला टच करत असून, घाबरलेली ही महिला अगतिकपणे आपले शरीर साडीने झाकण्याचा प्रयत्न करताना दिसत आहे. (Woman molestation video viral)
हा व्हिडीओ दरियापूर पोलीस ठाणे क्षेत्रात असलेल्या दरियापूर रेल्वे कारखाना ते दरिहरा चवंर येथून हरिहरा सरैया गावाकडे जाणाऱ्या मुख्य रस्त्यावरचा आहे. या व्हिडीओमध्ये पीडित महिला आरडाओरडा करताना दिसत आहे. तर काही लोक तिला पकडण्याचा प्रयत्न करत आहेत. ही महिला या नराधमांच्या तावडीतून सुटण्यासाठी धडपड करत आहे.आरजेडीचे मीडिया इन्चार्ज अरुण कुमार यादव आमि काँग्रेस नेते चंदन यादव यांनी हा व्हिडीओ शेअर करत राज्यातील नितीश कुमार सरकारवर टीका केली आहे.
ही घटना दोन आठवड्यांपूर्वीची आहे. तेव्हा काही जणांनी एक महिला आणि पुरुषाला जंगलामध्ये पकडले. आधी त्यांच्याकडे चौकशी केली. त्यानंतर ग्रामस्थांनी या महिलेची छेड काढण्यास सुरुवात केली. तसेच प्रियकरालाही मारहाण करण्यात आली. खूप विणवण्या केल्यावर प्रियकर त्या महिलेला तिथून घेऊन जाण्यात यशस्वी ठरला. यादरम्यान, महिलेशी छेडछाड करत असलेल्या एका व्यक्तीने व्हिडीओ तयार केला.
या प्रकरणी पोलीस अधीक्षक संतोष कुमार यांनी सांगितले की, हा व्हिडीओ समोर येताच पोलिसांनी अनेक पथके बनवून घटनेची सत्यता पडताळून आरोपींची ओळख पटवण्यास सुरुवात केली. तपासामध्ये या व्हिडीओत दिसत असलेल्या सर्व सहा जणांची ओळख पटवण्यात आली आहे. यामधील तिघांना अटक करण्यात आली आहे.