नवी दिल्ली - देशात अनेक धक्कादायक घटना घडत आहेत. अशीच एक नात्याला काळीमा फासणारी घटना राजस्थानच्या महेंद्रगड येथे घडली आहे. लव्ह मॅरेजमुळे कुटुंब संतापलं आणि थेट मुलीच्या सासूलाच संपवल्याचा प्रकार घडला आहे. प्रेम विवाहामुळे नाराज असलेल्या कुटुंबीयांनी मुलीच्या सासरी गोळीबार असून यामध्ये सासूचा मृत्यू झाला आहे. यानंतर कुटुंबीय आपल्या मुलीला घेऊन निघून गेले. याप्रकरणी पोलिसांत तक्रार दाखल करण्यात आली असून पोलीस आरोपींचा शोध घेत आहेत.
पोलिसांनी दिलेल्या माहितीनुसार, महेंद्रगडच्या बलाना येथील तरुणीने तीन महिन्यांआधी खातोड येथे राहणाऱ्या दीपकसोबत प्रेम विवाह केला. मुलगी आपल्या सासरी राहत होती. तेव्हा दोन बोलेरो, दोन बाईकवरून मुलीच्या कुटुंबातील आठ-दहा लोक सासरी आले. ते मुलीला जबरदस्तीन घेऊन जात होते. तेव्हा सासरच्या मंडळींनी त्यांना थांबवलं. त्याच दरम्यान माहेरच्यांनी गोळीबार केला. ही गोळी मुलीच्या सासूच्या पायाला लागली आणि मृत्यू झाला. तसेच कुटुंबातील एक जण जखमी झाला आहे.
एएसपी सिद्धार्थ जैन यांनी दिलेल्या माहितीनुसार, गोळीबार करणाऱ्या आरोपींनी मुलीला आपल्यासोबत नेलं आहे. खातोड गावात ही घटना घडली. घटनेची माहिती मिळताच पोलीस तातडीने घटनास्थळी दाखल झाले. सध्या अनेकांची चौकशी करण्यात येत असून अधिक तपास सुरू आहे. योग्य ती कारवाई केली जाईल. कुटुंबीयांनी नेलेल्या मुलीचा देखील शोध घेण्यात येत असल्याचं पोलिसांनी म्हटलं आहे. घटनेने परिसरात एकच खळबळ उडाली आहे. एका हिंदी वेबसाईटने याबाबतचे वृत्त दिले आहे.