नवी दिल्ली - उत्तर प्रदेशातील गोरखपूर जिल्ह्यात एकतर्फी प्रेमात अपयशी ठरल्याने एका तरुणाने ट्रिपल मर्डर केल्याची खळबळजनक घटना घडली आहे. प्रेमात वेड्या झालेल्या प्रियकराने धारदार शस्त्राने वार करून तरुणी आणि तिच्या आई-वडिलांची निर्घृण हत्या केली. त्याचवेळी पोलिसांच्या तत्परतेमुळे आरोपीला घटनास्थळावरून अटक करण्यात आली. खोराबार पोलीस ठाण्याच्या हद्दीतील रायगंज भागातील ही घटना आहे. या घटनेने परिसरात एकच खळबळ उडाली आहे.
मिळालेल्या माहितीनुसार, खोराबार पोलीस स्टेशन हद्दीतील रायगंज गावात राहणारे गामा निषाद हे बंगला चौकात कुटुंबासोबत राहत होते. तर गामा यांचे मोठे भाऊ रामा निषाद रायगंजमध्ये राहतात. रामा निषाद यांच्या मोठ्या मुलीचे लग्न होत असल्याची माहिती मिळत आहे. सोमवारी कुटुंबात एक समारंभ होणार होता. त्याच कार्यक्रमात सहभागी होण्यासाठी गामा रात्री 9 वाजण्याच्या सुमारास पत्नी संजू आणि मुलगी प्रीतीसह पायी जात होते.
घरापासून सुमारे 800 मीटर अंतरावर वाटेत हल्ला करणाऱ्या हल्लेखोराने संपूर्ण कुटुंबाला घेरले. गामा यांना काही समजू शकेल त्याआधीच हल्लेखोराने प्रीतीवर धारदार शस्त्राने हल्ला केला. त्याचवेळी मुलीला वाचवण्यासाठी गेलेल्या आई-वडिलांवरही धारदार शस्त्राने हल्ला केला. धारदार शस्त्राने जखमी झालेल्या तिघांचा जागीच मृत्यू झाला.
घटनेची माहिती मिळताच एसएसपी डॉ विपिन टांडा, एसपी सिटी कृष्ण कुमार विश्नोई, सीओ कैन्ट श्यामदेव घटनास्थळी पोहोचले. यानंतर मृतदेह शवविच्छेदनासाठी पाठविण्यात आला. एसएसपींनी दिलेल्या माहितीनुसार, या प्रकरणातील आरोपी अलोक पासवान याला अटक करण्यात आली आहे. तो संतकबीर नगर येथील राहणारा आहे आणि खोराबार मध्ये आपल्या मामा महेंद्र पासवान यांच्या घरी राहत होता. एका हिंदी वेबसाईटने याबाबतचे वृत्त दिले आहे.