एकतर्फी प्रेमातून तरुणींवर आणि महिलांवर अॅसिड हल्ला झाल्याच्या घटना याआधी अनेकदा समोर आल्या आहेत. मात्र हरियाणाच्या सोनीपतमध्ये याच्या अगदी उलट घटना घडली आहे. एका तरुणाने लग्नास नकार दिला म्हणून त्याच्या प्रेमात वेड्या झालेल्या तरुणीने त्याच्यावर थेट अॅसिड फेकल्याची धक्कादायक घटना समोर आली आहे. "तू माझा झाला नाहीस, तर मी तुला कोणाचाच होऊ देणार नाही" असं म्हणत तरुणीने त्याच्यावर पाच लीटर अॅसिड टाकलं आहे.
मिळालेल्या माहितीनुसार, श्याम सिंह असं अॅसिड हल्ला झालेल्या तरुणाचं नाव आहे. श्याम सिंह झज्जर जिल्ह्याच्या बहादूरगडचा रहिवासी आहे. तो अनाथ आहे. सोनीपूतच्या मयूर विहारमध्ये श्याम सिंह त्याच्या आत्यासोबत राहतो. श्याम एका कंपनीत काम असल्याचं त्याची आत्या अनिता यांनी सांगितलं. काही दिवसांपूर्वी श्यामची मैत्री गोहाना गावात राहणाऱ्या एका तरुणीशी झाली. तिने श्यामचा नंबर मिळवला आणि रोज त्याच्याशी संवाद साधू लागली.
काही दिवसांतच तरुणी तिच्या आईला घेऊन श्यामच्या आत्येच्या घरी पोहोचली. तिच्याकडून श्यामला लग्नासाठी मागणी घालण्यात आली. श्यामने थोडा वेळ मागितला. तरुणी विवाहित असून ती पतीपासून वेगळी राहत असल्याचं श्यामला समजलं. त्यामुळे त्याने लग्न करण्यास नकार दिला. नकार ऐकून ती संतापली. श्यामला वारंवार फोन करून त्रास देऊ लागली. तू माझा झाला नाहीस, तर मी तुला कोणाचाच होऊ देणार नाही, असं तिने श्यामला सांगितलं.
श्यामच्या आत्याने त्याला तरुणीचा नंबर ब्लॉक करण्यास सांगितलं. श्यामने नंबर ब्लॉक केल्यावर ती आणखी संतापली. 26 ऑक्टोबरला श्याम दूध आणण्यासाठी बाहेर गेला होता. तिथे तरुणी अॅसिडची 5 लीटरची बाटली घेऊन पोहोचली. श्यामला काही कळण्याआधी तिने त्याच्यावर संपूर्ण बाटली ओतली. श्यामचे हात, पाय, तोंड, कंबर गंभीररित्या भाजले. श्यामच्या नातेवाईकांना याबद्दल समजताच ते घटनास्थळी धावले. त्यांनी श्यामला रुग्णालयात दाखल केलं. श्यामची अवस्था गंभीर आहे. त्याच्यावर आयसीयूमध्ये उपचार सुरू आहेत. एका हिंदी वेबसाईटने याबाबतचे वृत्त दिले आहे.