पाडेगाव तालुका फलटण येथे घराबाहेर झोपलेल्या तीस वर्षीय तरुणाची हत्या झाल्याची धक्कादायक घटना आज सकाळी साडे सहा वाजता उघडकीस आली. याबाबत घटनास्थळावरून मिळालेली अधिक माहिती अशी की, पाडेगाव तालुका फलटण येथील शिवाचा मळा याठिकाणी राहणारा राहुल नारायण मोहिते हा युवक रात्री आपल्या घरासमोर झोपला होता. त्यावेळी अज्ञाताने धारदार शस्त्राने त्याचा गळा चिरून हत्या केली.
राहुलचा गळा धारदार शस्त्राने चिरल्याने रक्तस्त्राव होऊन त्याचा जागीच मृत्यू झाल्याचा संशय व्यक्त होत आहे. यानंतर लोणंद पोलिसांचे पथक घटनास्थळी दाखल झाले असून राहुल मोहिते याची हत्या कोणत्या कारणासाठी झाला याचा तपास करण्याचे काम सुरू आहे.
राहुल ट्रक व्यवसाय करीत होता. त्याच्या कुटुंबात आई, वडील एक भाऊ दोन बहीणी आहेत. तो आपल्या कुटुंबीयांसहीतच राहत होता. सर्पमित्र म्हणूनही त्याची या भागात ओळख होती. पूर्व वैमन्यासातून त्याची हत्या केली गेली असावी अशीही शक्यता व्यक्त करण्यात येत आहे. त्यानं यापूर्वी रात्रीच्या सुमारास आपल्या भावास फोन केला होता. काल त्याने गावच्या यात्रेनिमित्त अनेक मित्रांना फोन करून आमंत्रणही दिले होते. मात्र सकाळी साडे सहा वाजता आई पाणी तापविण्यासाठी उठली असता ही घटना उघडकीस आली.
घटनास्थळी फलटण उपविभागीय पोलीस अधिकारी तानाजी बर्डे यांनी भेट दिली असून श्वान पथकही दाखल झाले आहे. पुढील तपासाच्या सूचना त्यांनी लोणंद पोलिसांना दिल्या तपास सुरू करण्यात आला आहे.