पारशिवनी (नागपूर) : घराबाहेर गेलेल्या आईची वाट बघत रस्त्यालगत उभ्या असलेल्या चार वर्षीय बालकाला वेगात आलेल्या बाेलेराेने धडक देत चिरडले. ही बाेलेराे ट्रकला ओव्हरटेक करत हाेती. बालकाचा उपचारादरम्यान मृत्यू झाला. ही घटना पारशिवनी शहरात शुक्रवारी (दि. ६) दुपारी १:३०च्या सुमारास घडली.
नक्ष उर्फ नकुल आशिष भकने (४, रा. सरोदीटोली, पारशिवनी) असे मृत बालकाचे नाव आहे. नक्षचे आई-वडील मजुरी करून उदरनिर्वाह करतात. वडील कामावर गेल्याने घरी कुणीही नव्हते. आई बचत गटाचे पैसे भरण्यासाठी बाहेर गेल्याने ताे आईची वाट बघत रस्त्यालगत उभा हाेता. त्यातच पारशिवनीहून सावनेरच्या दिशेने जाणाऱ्या ट्रकला वेगात ओव्हरटेक करण्याच्या प्रयत्नात (एमएच ४०, केआर ७२५०) क्रमांकाच्या बाेलेराने नक्षला जाेरात धडक दिली.
त्यात गंभीर जखमी झाल्याने त्याला शहरातील ग्रामीण रुग्णालयात नेण्यात आले. प्रथमाेपचार केल्यानंतर त्याला नागपूर शहरातील मेडिकल हाॅस्पिटलमध्ये भरती करण्यात आले. तिथे उपचारादरम्यान त्याचा मृत्यू झाला. याप्रकरणी पारशिवनी पाेलिसांनी बाेलेराे चालकाविरुद्ध गुन्हा नाेंदवून तपास सुरू केला आहे.