मीरारोड - शिवसेना समर्थक आमदार गीता जैन यांच्या निधीतून भाईंदरच्या राई गावात सुरू असलेले काम बंद पडायला लावतानाच आयुक्तांना शिवीगाळ करणारा भाजपा नगरसेवकाचा व्हिडीओ व्हायरल झाला आहे. पुढील वर्षी होणाऱ्या पालिका निवडणुकीच्या पार्श्वभूमीवर हे राजकीय वाद शिवीगाळ, धमक्या टीकेचा विषय ठरला आहे.
भाईंदरच्या प्रभाग २३ मध्ये राई गावातील भाजपा नगरसेवक विनोद म्हात्रे यांचा शिवीगाळ करतानाचा व्हिडीओ व्हायरल झाला आहे. राई गावात तलाव परिसरात आमदार गीता जैन यांच्या निधीतून सेल्फी पॉईंट, ज्येष्ठ नागरिक कट्टा, सुशोभीकरण आदीचे काम सुरू होते.
सदर काम सुरू असताना नगरसेवक म्हात्रे यांनी त्या ठिकाणी उपस्थितांना दमदाटी व शिवीगाळ करत काम बंद पाडले. यावेळी काम करणाऱ्याने आपल्या कडे कामाचे आदेश आहेत असे सांगताच संतप्त म्हात्रे यांनी शिवीगाळ करत आयुक्तां बद्दल सुद्धा शिवी हासडली व सोमवारी समोर उभे कर असे सांगितले. काही दिवसांपूर्वी याच राई - मुर्धा परिसरात पालिकेच्या कीटकनाशक फवारणी वरून विनोद म्हात्रे व भाजपा नगरसेविका नयना म्हात्रे यांनी शिवसेनेच्या उपशहर संघटक तेजस्विनी पाटील यांना दमदाटी व शिवीगाळ केल्याचे व्हिडीओ व्हायरल झाले होते. त्या प्रकरणी या दोन्ही नगरसेवकांवर गुन्हा दाखल करण्यात आला होता.