कानपूर – ज्योतिषाजवळ समस्येचं निवारण करण्यासाठी आलेल्या २ मुलांनी केलेल्या चोरी प्रकरणात आता नवा खुलासा झाला आहे. चोरी केलेले पैसे इन्स्टाग्रामवर पोस्ट केलेल्या युवकांना पोलिसांनी पकडले. त्या युवकांच्या जबाबावरून आता पोलिसांनी ज्योतिषालाही अटक केली आहे. कानपूरच्या गोविंद नगर भागात एका घरात चोरी झाली होती. घराचे मालक व्यवसायाने ज्योतिषी होते.
ज्योतिष तरुण शर्मा यांनी पोलिसांना दिलेल्या तक्रारीत म्हटलं होतं की, २ मुले त्यांच्या गर्लफ्रेंडला कसं मनवायचे? या समस्येचं निवारण करण्यासाठी आले होते. त्यांनी नशेचे कोल्डड्रिंक मला देऊन घरात चोरी करून फरार झाले. पोलिसांनी जेव्हा या युवकांचा शोध सुरू केला तेव्हा त्यांच्या सोशल मीडिया इन्स्टाग्राम खात्यावर हॉटेलच्या रुममधील बेडवर नोटांचे बंडल असल्याचा व्हिडिओ दिसला. त्यानंतर पोलिसांनी सर्व्हिलान्सच्या माध्यमातून या दोन्ही अल्पवयीन युवकांना अटक केली.
अटक केलेल्या आरोपी युवकांचा पोलिसांनी जबाब घेतला त्यात धक्कादायक खुलासा झाला. ज्या ज्योतिषाच्या घरी चोरी झाली, ती का करण्यात आली हे युवकांनी पोलिसांना सांगितले. आरोपी युवक पोलिसांना म्हणाले की, जेव्हा आम्ही ज्योतिषाकडे समस्येचं निवारण करण्यासाठी गेलो तेव्हा ज्योतिषी तरुण शर्मा यांनी १ रात्र आमच्यासोबत जबरदस्तीने समलैंगिक संबंध बनवले. जेव्हा आम्ही विरोध केला तेव्हा तुम्हाला भस्म करू अशी धमकी दिली. त्याचसोबत तुमची समस्या दूर करू असंही ज्योतिषाने सांगितले त्यामुळे युवकांना जास्त विरोधही केला नाही.
दोन्ही मुलांवर अत्याचार करून जेव्हा तरुण शर्मा झोपी गेला तेव्हा युवकांनी बदला घेण्यासाठी त्याच्या घरात असलेली तिजोरी तोडून चोरी करत पैसे घेऊन फरार झाले. जेव्हा सकाळी तरुण शर्मा उठला तेव्हा युवक पैसे घेऊन फरार झाल्याचे पाहिले आणि त्याने बनावट कहाणी सांगून त्यांच्याविरोधात पोलीस तक्रार दिली. सध्या पोलिसांनी या घटनेचा तपास सुरू केला असून युवकांच्या तक्रारीवरून आरोपी तरूण शर्मालाही अटक करण्यात आली आहे. तरुण शर्मा याच्यावर कलम ३७७ अंतर्गत गुन्हा दाखल करण्यात आला आहे.