धमतरी - छत्तीसगडच्या धमतरी इथं बलात्काराच्या घटनेने माणुसकीला काळीमा फासला आहे. जिल्ह्यातील एका महिलेने शेजारील वृद्ध व्यक्तीकडून ५ हजार रुपये उधारी घेतली होती. ज्याची किंमत मुलीला तिची इज्जत देऊन चुकवावी लागली. या उधारीचा गैरफायदा घेत आरोपीनं अल्पवयीन मुलीचं खूप काळ लैंगिक शोषण केले. जेव्हा ही मुलगी ३ महिन्याची गर्भवती राहिली तेव्हा या प्रकाराचा खुलासा झाला. पोलिसांनी या प्रकरणी गुन्हा नोंदवत आरोपीला अटक केली आहे.
हा प्रकार कुरुद परिसरातील असून घटना उघड होताच पीडित मुलीच्या आईनं धमतरी पोलीस ठाण्यात २७ जानेवारीला तक्रार दाखल केली. हे उधारीचं प्रकरण २०२२ च्या ऑक्टोबरमधील आहे. अल्पवयीन मुलीच्या आईनं सांगितले की, घरात पैशाची चणचण होती त्यासाठी शेजारील वृद्ध सुदर्शन नागरची यांच्याकडून आर्थिक मदत म्हणून ५ हजार रुपये घेतले होते. ज्यादिवशी उधारी मागितली त्याच दिवशी अल्पवयीन मुलीला घरी बोलावलं आणि तिच्यासोबत बळजबरी केली. आरोपीनं पीडिता आणि महिलेला याविषयी कुठे वाच्यता केली तर जीवे मारेन अशी धमकी दिली. यानंतर आरोपी सातत्याने अल्पवयीन मुलीवर अत्याचार करत राहिला.
हा प्रकार सुरू असताना काही दिवसांपासून अल्पवयीन मुलीच्या तब्येतील बिघाड झाला. जेव्हा मुलीला जवळच्या हॉस्पिटलमध्ये उपचारासाठी नेले तेव्हा मुलगी ३ महिन्याची गर्भवती असल्याचं उघड झाले. हे प्रकरण समोर येताच पोलिसांनी पीडित मुलीच्या आईच्या तक्रारीवरून गुन्हा दाखल केला. त्यानंतर आरोपी ६० वर्षीय सुदर्शनला त्याच्या राहत्या घरातून २९ जानेवारीला अटक केली. आरोपीनं त्याचा गुन्हा कबूल केला असून पॉक्सो अंतर्गत त्याला अटक करण्यात आली आहे. या प्रकरणी पोलिसांनी आयपीसी २९४, ३२३, ५०६, ३७६(२) कलमातंर्गत कारवाईही केली आहे.