रस्त्यावर उभा राहण्याच्या वादातून तरुणावर कुऱ्हाड, चाकूनं प्राणघातक हल्ला

तिघांकडून तरुणाला जीवे मारण्याचा प्रयत्न; राजापेठ पोलिसानी नोंदवला गुन्हा

अमरावती: रस्त्यावर उभा राहण्याच्या वादातून एका तरुणावर धारदार शस्त्राने हल्ला करून त्याला जीवे मारण्याचा प्रयत्न करण्यात आला. पोलीस सुत्रानुसार, चिनी उर्फ संतोष सोमनाथ यादव (वय ३०, रा. चिंचफैल) असे गंभीर जखमी झालेल्या तरुणाचे नाव आहे. ही घटना रविवारी रात्री चिचफैल परिसरात घडली. याप्रकरणात राजापेठ पोलिसांनी संदीप वावळे (४१), चेतन वावळे (२६) आणि राजेंद्र माने (४८ सर्व रा. चिचफैल) या तिघांना अटक केली आहे. न्यायालयाने तिन्ही आरोपींना १३ मेपर्यंतची पोलिस कोठडी सुनावली आहे.            रविवारी रात्री ११ वाजताच्या सुमारास चिनी उर्फ संतोष सोमनाथ यादव हा तरुण चिंचफैल परिसरातील रस्त्यावर उभा होता. त्यावेळी आरोपी तेथून जात असताना, त्यांनी संतोषला रस्त्यावर का उभा आहेस असा प्रश्न विचारून हटकले. यावरून त्यांचा वाद उफाळून आला. या वादानंतर आरोपींनी संतोषवर कुऱ्हाड व चाकूने प्राणघातक हल्ला चढविला. त्यात संतोष गंभीर जखमी झाला. काही नागरिकांनी संतोषला तत्काळ जिल्हा सामान्य रुग्णालयात दाखल केले. या घटनेची तक्रार फिर्यादी आरती राजेश यादव यांनी राजापेठ ठाण्यात नोंदवली. त्यानुसार पोलिसांनी अटक तिघांसह एकूण सात जणांविरुद्ध भादविची कलम ३०७,१४३,१४७,१४८ ,१४९ भादवि गुन्हा दाखल केली आहे.