नवी दिल्ली – राजधानी दिल्लीत प्रियकरानं प्रेयसीची चाकू भोसकून निर्दयी हत्या केल्यानं परिसरात खळबळ माजली आहे. महरौली परिसरातील ही घटना आहे. याठिकाणी प्रियकर आणि प्रेयसीत काही कारणांवरून वाद झाला. हा वाद इतका विकोपाला गेला की संतापाच्या भरात प्रियकरानं प्रेयसीचं आयुष्य संपवलं. आरोपी प्रियकरानं चाकूने प्रेयसीच्या गळ्यावर अनेक वार केले. यात ती गंभीर जखमी झाली. घटनास्थळावर पोहचलेल्या पोलिसांनी जखमी मुलीला हॉस्पिटलला नेले परंतु उपचारादरम्यान तिचा मृत्यू झाला.
पोलिसांच्या माहितीनुसार, २० वर्षीय आरोपी हरिश हा महरौली परिसरात राहत होता. तर मृत १९ वर्षीय पीडित युवती खानपूरच्या दुर्गा विहार वास्तव्यास होती. गेल्या २-३ वर्षापासून हरिश आणि युवती यांच्यात प्रेम संबंध होते. मागील २ महिन्यापासून हे दोघंही आया नगर भागात एकत्र राहत होते. आरोपी ऑटो रिक्षा दुरुस्त करण्याचं काम करत होता. परंतु १ वर्षापासून त्याची नोकरी गेली. त्याला दुसरीकडे कुठेही नोकरी मिळाली नाही. या कारणावरून प्रियकर आणि प्रेयसीत सातत्याने वाद होत असे.
ब्रेकअपमुळे नाराज होता हरीश
६ दिवसांपूर्वी मृत युवती आणि हरीश दोघांमध्ये वाद झाला. ज्यानंतर तिने हरीशसोबत ब्रेकअप केला आणि तिच्या आई वडिलांकडे परत गेली. त्यामुळे हरिश खूप रागात होता. त्याने प्रेयसीला भेटण्यासाठी बोलावलं. युवतीने प्रियकाराची विनंती मान्य करत भेटायला गेली. सोमवारी संध्याकाळी ५ वाजता जेव्हा ते भेटले तेव्हा पुन्हा दोघांमध्ये वाद सुरू झाला. हरीश आधीपासून रागात होता. युवती तिथून निघायला लागली तेव्हा त्याने तिच्या गळ्यावर चाकूने वार केला. त्यात ती गंभीर जखमी झाली.
या घटनेची माहिती मिळताच पोलीस त्याठिकाणी हजर झाले. तोपर्यंत हरीशने पळ काढला होता. रक्ताच्या थारोळ्यात पडलेल्या युवतीला पोलिसांनी हॉस्पिटलमध्ये उपचारासाठी नेले. मात्र उपचारावेळी युवतीचा मृत्यू झाला. पोलिसांनी या प्रकरणात प्रियकराविरोधात गुन्हा नोंदवला आहे. आरोपी हरिशला शोधण्यासाठी पोलिसांचे पथक नेमण्यात आले. आरोपीला अटक करून पुढील तपास केला जाणार आहे. मात्र या घटनेने परिसरात खळबळ माजली आहे.