इंदूर - व्यावसायिक राजा रघुवंशी हत्या प्रकरण आणखी गुंतागुंतीचे बनत चालले आहे. या प्रकरणात राजाची हत्या करणाऱ्या आरोपींना पोलिसांनी अटक केली आहे. हत्येचे कोडेही उलगडले आहे परंतु अद्यापही अनेक प्रश्न अनुत्तरीत आहेत. त्यामुळे सातत्याने या प्रकरणात नवनवीन हैराण करणारे खुलासे समोर येत आहेत. आता राजाची पत्नी सोनम आणि तिच्या बॉयफ्रेंडने नवं रहस्य उलगडले आहे. राजाच्या हत्येनंतर हे दोघे अशा महिलेची हत्या करण्याची तयारी करत होते, ज्याबाबत पोलिसांची दिशाभूल करण्यात येत आहे. हे दोघे कुठल्याही एका महिलेची हत्या करून तिचा मृतदेह जाळणार होते, जेणेकरून ही सोनम असल्याचं पोलिसांना वाटेल हे तपासात उघड झाले.
मेघालय पोलिसांच्या चौकशीत सोनमचा बॉयफ्रेंड राज कुशवाह हाच हत्येच्या कटाचा मास्टरमाईंड असल्याचे समोर आले. सोनम या हत्याकांडाचा भाग होती. सोनमच्या चौकशीआधीच तिचा बॉयफ्रेंड राज आणि इतर तीन आरोपींना सोनम बुरखा घालून मेघालयातून पळाली होती हे उघड केले. टॅक्सी, बस आणि ट्रेनसारख्या माध्यमांचा वापर करून ती मध्यप्रदेशच्या इंदूर येथे पोहचली होती. राजाची मेघालयात हत्या करण्याचे षडयंत्र सोनमने ११ मे च्या लग्नानंतर केले. हा प्लॅन राजचा होता, सोनम त्यासाठी तयार झाली होती. या हत्येतील आरोपी हे राजचे मित्र होते, हत्येत सुपारी देण्याचा अँगल नाही असं पोलीस अधीक्षक विवेक सायम यांनी सांगितले. परंतु प्लॅनिंग हत्येचे होते, राजने त्याच्या ३ मित्रांसोबत आणि सोनमच्या मदतीने हे सगळे केले.
राजाच्या हत्येसाठी बनवले होते २ प्लॅन
माहितीनुसार, राजने हत्येसाठी त्याच्या मित्रांना ५० हजार खर्चासाठी पाठवले होते. राजा रघुवंशीची हत्या करण्यासाठी २ प्लॅन बनवण्यात आले होते. पहिला प्लॅन सेल्फी घेताना राजाला धक्का मारून दरीत ढकलण्याचा होता. जर ते फेल झाले तर प्लॅन बी तयार केला होता. त्यात आधी राजाला मारून टाकायचे मग त्याचा मृतदेह दरीत फेकायचा. पहिला प्लॅन फेल झाला तेव्हा आरोपींनी प्लॅन बी नुसार राजाची हत्या केली आणि त्याचा मृतदेह दरीत फेकून दिला.
दरम्यान, प्लॅनिंगनुसार राज कुशवाहचे मित्र आकाश राजपूत, विशाल ठाकूर आणि आनंद कुर्मी हे तिघे गुवाहाटीला आधीच पोहचले होते. गुवाहाटीत राजाच्या हत्येचे प्लॅनिंग केले होते परंतु त्यात यश आले नाही. त्यानंतर शिलांग आणि मावलाखियात गावाजवळ २ वेळा राजाला मारण्याचा प्रयत्न केला परंतु त्यावेळीही हल्लेखोर अयशस्वी ठरले. त्यानंतर २३ मे दुपारी २ वाजता सावडोंग फॉल्सजवळ राजा रघुवंशीची हत्या केली. तिन्ही हल्लेखोरांनी पाळीपाळीने राजावर हल्ला केला. आकाशने रक्ताने माखलेला टीशर्ट फेकून दिला आणि सोनमचा रेनकोट घातला. मेघालयातील कोर्टाने सर्व पाच आरोपींना ८ दिवस पोलीस कोठडी सुनावली आहे. त्यानंतर पोलिसांनी आणखी तपास केला असता राज आणि सोनम सातत्याने संपर्कात असल्याचे पुढे आले. कॉल डिटेल्समधून समोर आले की, १६ मे ते २३ मे या काळात या दोघांमध्ये ३० हून अधिक वेळा बोलणे झाले. ज्यात रात्री उशिरापर्यंत आणि मेसेजवरही बोलणे होत होते.