ठाणे - अनेक लोक आपल्या आवडत्या फिल्म स्टार, क्रिकेटर अथवा राजकीय नेत्यांच्या नावावर त्यांचं स्वत:चं नाव ठेवतात. ही खूप सामान्य गोष्ट आहे परंतु नाव बदलणं कधी खूप महागातही पडू शकते. ठाण्यात असाच काहीसा प्रकार समोर आला आहे. जिथं २७ वर्षीय नगमा नूर मकसूदअलीला तिचं नाव बदलल्यामुळे कायदेशीर कोंडीत अडकावं लागलं आहे.
नगमानं १० वर्षापूर्वी आधार कार्ड बनवताना स्वत:चं नाव सनम खान लिहिलं होते. तिला तिचं नाव पसंत नव्हते. त्यानंतर एका स्थानिक दुकानदाराच्या मदतीने तिने नावात बदल केला. अलीकडेच एका पाकिस्तानी नागरिकासोबत लग्न आणि पाकिस्तानात जाण्यासाठी तिच्या कागदपत्रांची पडताळणी करण्यात आली तेव्हा तिने नाव बदलल्याचा खुलासा समोर आला आहे.
माहितीनुसार, नगमानं २०१५ साली बेकायदेशीरपणे स्वत:चं नाव बदलून सनम खान असं केले होते. तिने अनेक चित्रपटात हे नाव ऐकलं होतं. त्यामुळे हेच नाव ठेवायचे तिने ठरवले. २०२२ मध्ये नगमानं पाकिस्तानातील एका युवकासोबत ऑनलाईन भेट केली त्यानंतर त्याच्यासोबत निकाह केला. नगमाला आधीच्या लग्नापासून २ मुली होत्या. यावर्षीच्या सुरुवातीला ती मुलींसह पाकिस्तानच्या एबटाबाद येथे गेली. १७ जुलैला आजारी आईची देखभाल करण्यासाठी ती पुन्हा ठाण्यात परतली. मात्र पाकिस्तानातून भारतातील प्रवासावेळी तिच्या कागदपत्रांची पडताळणी केली आणि त्यात हा प्रकार उघडकीस आला.
पाकिस्तानची हेर असल्याचा आरोप
२२ जुलैला पोलिसांकडून समन्स मिळाल्यानंतर नगमा ३ दिवस वर्तकनगर पोलीस ठाण्यात चौकशीला गेली. तपासात तिचा पासपोर्ट आणि पॅनकार्डसारखी कागदपत्रे सनम खान नावाने कसे मिळवले याची विचारणा करण्यात आली. ही भनक माध्यमांना लागताच नगमावर पाकिस्तानी हेर असल्याचा आरोप झाला. काही लोकांनी तिची तुलना सीमा हैदरची केली जी पाकिस्तानची नागरिक असून बेकायदेशीरपणे भारतात आली.
अवघ्या २० हजारात बदललं नाव
इंडियन एक्सप्रेस रिपोर्टनुसार, नगमाविरोधात बनावट कागदपत्रे बनवून आधार कार्ड बनवल्याचा गुन्हा दाखल झाला असून २५ जुलैला तिला अटक करण्यात आली. ऑगस्टच्या पहिल्या आठवड्यात तिला जामीनावर सोडण्यात आले. या प्रकरणी दुकानदारांवरही गुन्हा नोंद झाला आहे. दुकानदाराने नगमाला तिच्या आवडीच्या नावाने जन्म प्रमाणपत्र, पॅन कार्ड आणि आधार कार्ड बनवून देण्यासाठी २० हजार रुपये घेतले. त्यात तिची जन्म साल १९९७ ऐवजी २००१ केले होते.