लखनौ – शहरातील एका युवकानं आधी त्याच्या मित्रासोबत बसून दारू प्यायली त्यानंतर नशेत विट मारून त्याची हत्या केली. इतकेच नाही तर युवकाने मित्राचा मृतदेह पेट्रोल टाकून जाळला आणि घटनास्थळावरून पसार झाला. घटनास्थळी मिळालेल्या मृतदेहाच्या चप्पलेने याचा खुलासा झाला. सध्या पोलिसांनी आरोपीला अटक केली आहे. सुरुवातीच्या तपासात चोरीच्या उद्देशाने ही हत्या केल्याचं समोर आले आहे.
मिळालेल्या माहितीनुसार, लखनौच्या बंथरा भागात राहणारा ३२ वर्षीय सनी बँकेत १ लाख रुपये जमा करण्यासाठी गेला होता. परंतु संध्याकाळपर्यंत तो घरी परतला नाही. सनीचे वडील अवधेश सिंह यांनी मुलगा घरी आला नाही म्हणून सगळीकडे शोधाशोध सुरू केली. संध्याकाळी गावाजवळच सनीची बाईक संशयास्पद स्थितीत आढळली. काहीतरी विपरीत घडल्याचा अंदाज आल्यानंतर कुटुंबाने पोलीस ठाण्यात धाव घेतली. त्यानंतर पोलिसांनी सनीचा शोध सुरू केला.
तपासात रात्री उशीरा बिजनौर रोडवर जंगलात अर्धवट जळालेल्या स्थितीत सनीचा मृतदेह सापडला. सुरुवातीला पोलिसांनी सनीच्या घरच्यांना मृतदेहाची ओळख पटवण्यासाठी बोलावले तेव्हा त्यांच्या पायाखालची जमीन सरकली. माहितीनुसार, सनी त्याचा मित्र दुर्गेशसोबत ९ ऑगस्टला घरातून बाहेर निघाला होता. दोघे एकत्र होते. त्यात सनीने मोबाईल खरेदी केला आणि ढाब्यावर जेवण केले. ८००० रुपये स्मॅक आणि दारू प्यायली. तेव्हा दुर्गेशचे लक्ष सनीच्या पैशांवर पडले.
सनीच्या पाकिटातील पैसे पाहून दुर्गेशला लालसा आली. त्यात दुर्गेशने सनीची हत्या केली. सनीच्या मृतदेहाची ओळख लपवण्यासाठी दुचाकीतील पेट्रोल ओतून सनीचा मृतदेह जाळला आणि पैसे घेऊन तो फरार झाला. पोलिसांनी घटनास्थळी सनीची चप्पल सापडली. या चप्पलेवरून सनीची ओळख पटली. त्यानंतर पोलिसांनी चौकशी करून दुर्गेशला ताब्यात घेतले. पोलिसांनी खाकीचा धाक दाखवताच दुर्गेशने सनीची हत्या केल्याचे कबुल केले. सध्या या प्रकरणी पोलीस आणखी तपास आणि पुरावे गोळा करत आहे. आरोपीला जेलमध्ये ठेवले असून लवकरच कोर्टात हजर करणार आहेत.