मुरादाबाद - उत्तर प्रदेशातील मुरादाबाद येथे एकतर्फी प्रेमातून वेडसर झालेल्या युवकाने युवतीचा गळा दाबून खून केला. इतकेच नाही तर या हैवान युवकाने युवतीच्या प्रायव्हेट पार्टसह शरीरावर चाकूचे ४५ वार केलेत. त्यानंतर युवतीचा मृतदेह शेतात फेकून दिला. या घटनेत मृत युवतीच्या आईने केलेल्या तक्रारीनंतर युवकावर हत्येचा गुन्हा दाखल करण्यात आला असून त्याला पोलिसांनी अटक केली आहे.
मुरादाबादच्या मैनाठेर परिसरात राहणारे हसन यांनी २१ वर्षीय मुलगी बकऱ्यांना चारा आणण्यासाठी शेतात गेली होती. रात्री उशिरापर्यंत ती घरी न परतल्याने कुटुंबाला चिंता सतावली. नातेवाईकांनी तिचा शोध घेतला परंतु ती कुठेच सापडली नाही. दुसऱ्या दिवशी सकाळी शेतात मुलीचा मृतदेह सापडला. या घटनेची माहिती पोलिसांना समजताच ते घटनास्थळी दाखल झाले. युवतीच्या शरीरावर अनेक ठिकाणी जखमा होत्या. पोलिसांनी तिचा मृतदेह ताब्यात घेत पोस्टमोर्टमला पाठवला.
पोस्टमोर्टम रिपोर्टमधून खुलासा
रविवारी संध्याकाळी मुलीचा पोस्टमोर्टम रिपोर्ट समोर आला. त्यात धक्कादायक खुलासा झाला. रिपोर्टमध्ये मुलीच्या प्रायव्हेट पार्टसह ४५ ठिकाणी चाकूने वार केल्याच्या खूणा आढळल्या. पोलिसांनी या घटनेची चौकशी केली असता एका युवकावर कुटुंबाने संशय घेतला. हा आरोपी मागील २ वर्षापासून मुलीच्या मागे होता तो तिच्यावर एकतर्फी प्रेम करायचा. त्यातूनच त्याने हे क्रूर कृत्य केल्याचे तपासात उघड झाले. या घटनेतील आरोपीला पोलिसांनी बेड्या ठोकल्या आहेत.
सहा बहिणी भावंडांमध्ये मृत सायरा ही पाचवी होती. तिचे वडील हसन यांचा आधीच मृत्यू झाला आहे. वडिलांच्या मृत्यूनंतर मोठा भाऊ आणि आई कुटुंबाचा उदरनिर्वाह चालवतात. सायराच्या या हत्येनंतर कुटुंबाला मोठा धक्का बसला आहे. पोलिसांना आरोपीजवळ युवतीचा मोबाईल सापडला. त्यात या दोघांमध्ये एका महिन्यात ५०० हून अधिक कॉल झाल्याचे समोर आले. सायरा दुसऱ्या युवकाशी बोलायची असा संशय आरोपीला होता. शनिवारी संध्याकाळी या दोघांमध्ये वाद झाला. त्यावेळी धारदार शस्त्राने तिची हत्या करून शेतात मृतदेह लपवला असं आरोपीने कबुल केले.