अकोटः सावत्र पित्याने अल्पवयीन मुलीचे सातत्याने लैंगिक शोषण केले. त्यामुळे मुलगी गरोदर राहिल्याचा गंभीर प्रकार शनिवारी समोर आला. विशेष म्हणजे, मुलीचे अपहरण झाल्याची फिर्याद देणाऱ्या पित्यालाच आता अकोट शहर पोलिसांनी गजाआड केले आहे. पोलिसांनी आरोपी सावत्र पित्याला अटक केली असून, न्यायालयाने त्याला २४ जानेवारीपर्यंत पोलीस कोठडी सुनावली आहे.
अकोट येथील एका सावत्र पित्याने शहर पोलीस स्टेशनमध्ये १६ वर्षीय मुलगी ही घरी कोणालाही न सांगता निघून गेली. तिला अज्ञात व्यक्तीने पळविल्याचा आरोप करीत, १८ जानेवारी रोजी पोलीस ठाण्यात तक्रार दिली. त्यानुसार, अकोट पोलिसांनी तत्काळ भादंवि कलम ३६३ नुसार गुन्हा दाखल केला. मुलीचा शोध सुरू असताना, २० जानेवारी रोजी बेपत्ता मुलगी आपल्या आईसोबत पोलीस स्टेशनमध्ये हजर झाली. मुलीला सुरक्षित बघून पोलिसांना दिलासा मिळाला. मात्र, मुलगी व आईने घडलेल्या घटनेची आपबिती पोलिसांना सांगितली. अपहरणाची तक्रार देणाऱ्या सावत्र पित्याने मुलीला सात महिन्यांपूर्वी अमरावतीवरून अकोटला घरी आणले. या ठिकाणी तो सतत तिच्यावर बळजबरीने अत्याचार करायचा. एकदिवस त्याने मुलीला थंडपेयामधून दारू पाजून लैंगिक अत्याचार केला. त्यामुळे अल्पवयीन मुलगी गरोदर राहली.
दरम्यान, तिने अकोट येथून पलायन करून आईकडे जात, सर्व हकिकत तिला सांगितली. त्यामुळे आई व मुलीने अकोट शहर पोलीस स्टेशनमध्ये येऊन तक्रार दाखल केली. दरम्यान, पोलिसांनी आरोपी सावत्र पित्याविरुद्ध भादंवि कलम ३५४,३७६,५०४ सह पाेक्सो कायद्यांतर्गत गुन्हा दाखल केला. आरोपी सावत्र पित्याला शहर पोलिसांनी अटक करून न्यायालयात हजर केले. न्यायालयाने त्याला २४ जानेवारीपर्यंत पोलीस कोठडी ठेवण्याचे आदेश दिले. पुढील तपास शहर पोलीस निरीक्षक प्रकाश अहिरे यांचे मार्गदर्शनाखाली पोलीस उपनिरीक्षक राजेश जवरे करीत आहेत.
खाकी वर्दीची मानवता...
पीडित अल्पवयीन मुलगी व आई हे गरीब कुटुंबातील आहेत. त्यांची हलाखीची परिस्थिती पाहता, खाकी वर्दीलाही पाझर फुटला. माणुसकी, सहृदयेतून पोलिसांनी पीडित मुलगी व तिच्या आईच्या जेवणासह निवासाची उत्तम व्यवस्था केली.