वैजापुर ( औरंगाबाद ) : नाशिक येथे लग्नाच्या समारंभासाठी निघालेल्या वऱ्हाडी ट्रॅव्हल्स व ट्रकचा आज सकाळी तालुक्यातील तिड़ी गावाजवळ समोरा समोर अपघात झाला. अपघातात बसमधील ३० ते ३५ जण जखमी आहेत, यातील ट्रक चालकाची प्रकृती चिंताजनक आहे. जखमींवर वैजापुरच्या उपजिल्हा रुग्णालयासह औरंगाबाद येथील घाटी रुग्णालयात उपचार सुरू आहेत.
आज सकाळी औरंगाबादहून एक वऱ्हाडी ट्रॅव्हल्स ( एमएच-२२-एफ-२२२१ ) नाशिककडे निघाली. ट्रॅव्हल्स तिड़ी गावाजवळ येताच औरंगाबादकडे चाललेल्या एका ट्रकसोबत (एमएच - १८ -सी - ७६५२ ) समोरासमोर धडक झाली. अपघात दोन्ही गाड्यांचे प्रचंड नुकसान झाले असून दोन्ही चालकासह ३५ जण जखमी आहेत.
अपघाताची माहिती मिळताच वैजापुर पोलिस ठाण्याचे सहाय्यक पोलिस निरीक्षक रामहरी जाधव, पोलिस नाईक संजय घुगे, राहुल थोरात, गुणवंत थोरात, शेख रज्जाक यांनी घटनास्थळी धाव घेतली. त्यांनी स्थानिकांच्या मदतीने जखमींना बाहेर काढले. जखमींवर वैजापूर उपजिल्हा रुग्णालय व औरंगाबाद येथील घाटी रुग्णालयात उपचार सुरु आहेत. दरम्यान, ट्रॅव्हल्सचा चालक फरार झाला असून त्याच्या विरोधात गुन्हा दाखल करण्याची प्रक्रिया सुरु आहे.