छत्रपती संभाजीनगर/बीड : महिलांवरील अन्याय, अत्याचार थांबवून त्यांना सुरक्षितता प्रदान करण्यासाठी, तसेच त्यांना तक्रारी दाखल करण्यासाठी योग्य मंच देण्याकरिता महिला आयोग कायम आपल्यासोबत आहे. ऊसतोड कामगार महिलांच्या आरोग्याची काळजी घेण्यासाठी 'आरोग्य मित्र' उपक्रम राबविण्यावर भर देण्यात येईल, असा विश्वास महाराष्ट्र राज्य महिला आयोगाच्या अध्यक्षा रूपाली चाकणकर यांनी मंगळवारी दिला.
ऊसतोड महिलांची गर्भपिशवी काढण्याच्या प्रकाराबाबत चाकणकर यांनी नाराजी व्यक्त केली. महिलांच्या आरोग्याला सर्वोच्च प्राधान्य असल्याचेही रूपाली चाकणकर यांनी सांगितले. ऊसतोड कामगार महिलांची गर्भपिशवी काढणे, आरोग्य समस्या,बालविवाह याबाबत महिला आयोगाच्या अध्यक्षा चाकणकर यांनी विभागीय आयुक्त कार्यालयात आढावा घेतला. यावेळी आयोगाच्या उपसचिव डॉ. पद्मश्री वैनाडे, विशेष पोलिस महानिरीक्षक वीरेंद्र मिश्र, पोलिस आयुक्त प्रवीण पवार, जिल्हाधिकारी दिलीप स्वामी, बीडचे जिल्हाधिकारी विवेक जॉन्सन, अपर आयुक्त विजयसिंह देशमुख, पोलिस अधीक्षक डॉ. विनयकुमार राठोड, बीडचे पोलिस अधीक्षक नवनीत काँवत, जि.प. मुख्य कार्यकारी अधिकारी अंकित, बीड जि.प.चे मुख्य कार्यकारी अधिकारी वासुदेव साळुंके यांच्यासह विविध विभागांचे विभागप्रमुख उपस्थित होते. विभागीय महिला व बालविकास उपायुक्त रेश्मा चिमंद्रे यांनी विभागातील महिलांविषयक उपक्रमाबाबत माहिती दिली. सरपंच, पोलिस पाटील, ग्रामसेवक, अंगणवाडी सेविका, आशा कार्यकर्त्यांची महत्त्वाची भूमिका असून, नागरिकांनी स्थानिक प्रशासनाच्या मदतीने बालविवाह आदी 'कु'प्रथा रोखण्यासाठी संकल्प करावा, असे आवाहन केले.
लोकमत'च्या वृत्तांची दखलबीड जिल्ह्यात २०१९ पूर्वी ५७६ आणि नंतर २६७ ऊसतोड महिलांच्या गर्भपिशवी शस्त्रक्रिया केल्याचे वृत्त प्रकाशित केले होते. त्यानंतर १६ जून रोजी जिल्ह्यातील बालविवाहाचा मुद्दाही चव्हाट्यावर आणला होता. या दोन्ही संवेदनशील वृत्तांची दखल घेत महिला आयोगाने दखल घेत तातडीचे बैठक घेतली. त्यात बालविवाह, गर्भलिंग निदान चाचणी, स्त्रीभ्रूणहत्या, हुंडाबळी, विधवा, एकल महिला यांच्या समस्या आदींबाबत जनजागृती करण्यात येत असल्याचे सांगत बालविवाह रोखण्यासाठी सर्व पातळीवर प्रयत्न सुरू असल्याचा दावा केला.
जॉन्सन यांची संकल्पनाबीडसह मराठवाड्यातील अनेक जिल्ह्यांत ऊसतोड महिला कामगार स्थलांतर करतात. त्यांच्या आरोग्याच्या अनेक समस्या समोर आल्या आहेत. यासाठी बीडचे जिल्हाधिकारी विवेक जॉन्सन यांच्या संकल्पनेतून यावर्षी 'आरोग्य मित्र' उपक्रम राबविण्यात येत आहे. या अंतर्गत ऊसतोडणीसाठी स्थलांतर करणाऱ्या महिलांसाठी त्याच समूहातील एकाची आरोग्य मित्र म्हणून नेमणूक करण्यात येणार आहे. आरोग्य मित्र आरोग्याच्या समस्यांबाबत आशासेविका, अंगणवाडी सेविकांच्या संपर्कात असेल.