खुलताबाद (छत्रपती संभाजीनगर) : शहरातील साळीवाडा परिसरात शुक्रवारी संध्याकाळी आलेल्या वादळी वाऱ्यासह पावसाने थैमान घातले. सायंकाळी साडेसहाच्या सुमारास खुटाबाहुली येथील गंगा कुशीनाथ मोरे यांच्या घरावरील सोलार सिस्टमवर अचानक वीज कोसळली. यामुळे त्यांच्या घरातील एलईडी टीव्ही, इन्वर्टर, पंखे, बल्ब, बॅटरी आदी साहित्य जळून खाक झाले. अंदाजे १ लाख ५० हजार रुपयांचे नुकसान झाल्याचे सांगण्यात येते.
सुदैवाने घरात योग्य अर्थिंग केल्यामुळे कोणतीही जीवितहानी झाली नाही. गंगा मोरे यांनी दिलेल्या माहितीनुसार, विजेच्या तडाख्याचा फटका शेजारील कुटुंबांनाही बसला. गजानन फुलारे यांचा एलईडी टीव्ही, विष्णू फुलारे यांचे चार पंखे, सोमीनाथ लिंगायत यांचे दोन पंखे, तर चंद्रकांत सोनवणे यांचा डीटीएच सेटअप बॉक्सही जळून गेला.
शहराच्या गजबजलेल्या भागात वीज कोसळल्यामुळे नागरिकांमध्ये घबराट निर्माण झाली आहे. या घटनेची माहिती मिळताच, खुलताबाद नगर परिषदेचे अंकुश भराड व त्यांच्या सहकाऱ्यांनी शनिवारी दुपारी घटनास्थळी भेट देत पंचनामा केला.