पैठण ( औरंगाबाद ) : पैठण तहसीलच्या गौण खनिज प्रतिबंधक पथकाच्या शासकीय जीपला धडक मारून पळून जाण्याच्या प्रयत्नात अवैध मुरमाची वाहतूक करणाऱ्या ट्रक्टरची ट्रॉली जीपवर पलटी झाल्याने जीपचे मोठे नुकसान झाले. पथकातील कर्मचारी जीपमधून खाली उतरलेले असल्याने या घटनेत जीवीतहानी झाली नाही. सोमवारी रात्री ९ वाजेच्या दरम्यान ही थरारक घटना घडली असून अंधाराचा फायदा घेत ट्रॅक्टर चालक तेथून पसार झाला. या प्रकरणी रात्री पैठण पोलीस ठाण्यात गुन्हा नोंदविण्याची कारवाई सुरू होती.
पैठण परिसरात गौणखनिज तस्करांनी सध्या डोके वर काढले असून प्रशासनातील काही हस्तका कडून अभय मिळत असल्याने तस्करांची मगरूरी अलिकडे जास्तच वाढली आहे. यातूनच आज मुरूमाचे अवैध उत्खनन व वाहतूक करणाऱ्या ट्रक्टर चालकाने शासकीय वाहनावर ट्रॅक्टर घालून पळून जाण्याचे आचरट धाडस केले. परंतु ट्रक्टर ट्रॉफी पलटी झाल्याने त्याचे धाडस अंगलट आले. पैठण तहसील कार्यालयाचे गौणखनिज प्रतिबंधक पथक शासकीय जीप घेऊन पैठण शेवगाव रोडवर गस्त घालत असताना पाटेगाव ग्रामपंचायत रोडने मुरमाने भरून आलेले ट्रक्टर पथकातील मंडळ अधिकारी गणेश सोनवणे, तलाठी लक्ष्मीकांत गोजरे, निलेश आहेर, दिपक नवगीरे, सतीश दळवे, गोपाळ वैद्य यांनी पाटेगाव फाट्यावर अडवले. यावेळी त्यांनी चालकाकडे रॉयल्टी बाबत चौकशी केली मात्र रॉयल्टी नसल्याचे त्याने सांगितले. ट्रक्टर त्यास तहसील कार्यालयात घेण्यास सांगितले व पथकातील कर्मचारी जीप मध्ये बसणार तोच ट्रक्टर चालकाने ट्रक्टरसमोर असलेल्या जीपला धडक देऊन ट्रक्टर पळवून नेण्याचे धाडस केले. मात्र, धडक बसताच मुरमाने ओव्हरलोड भरलेली ट्रॉली जीपवरच उलटली.
अचानक झालेल्या घटनेने पथकातील कर्मचारी मिळेल त्या दिशेला जीव वाचवून पळाल्याने बचावले. अन्यथा या घटनेत जीवीतहानी झाली असती असे तलाठी गोजरे यांनी सांगितले. दरम्यान गावकऱ्यांच्या मदतीने ट्रॉली सरळ करून ट्रक्टर तहसील कार्यालयात जमा करण्यात आले असून या घटनेचा पंचनामा करण्यात आला आहे. या बाबत तहसील पथकाकडून पैठण पोलीस ठाण्यात फिर्याद देण्यात आली असून फरार झालेल्या ट्रक्टर चालका विरोधात गुन्हा दाखल करण्याची प्रक्रिया सुरू होती.
पोलीस पथकाशिवाय कारवाईगौणखनिज पथकाने पोलीस संरक्षण घेऊन रात्री कारवाई करावी असे जिल्हा प्रशासनाचे आदेश आहेत मात्र तहसीलचे पथक पोलीसांना सोबत न ठेवताच कारवाई करतात. यामुळे असे प्रकार समोर येत आहेत. पथकाकडून पोलीस बंदोबस्त का टाळला जातो याबाबत आश्चर्य व्यक्त करण्यात येत आहे.