वाळूज महानगर : पादचारी ज्येष्ठ महिलेस लिफ्ट देण्याचा बहाणा करुन तिला मारहाण करुन दुचाकीस्वार भामट्याने तिचे दागिने लुटल्याची घटना आज गुरुवार (दि.१८) दुपारी साडे तीन वाजेच्या सुमारास ए.एस.क्लब- लिंकरोडवर घडली.
या विषयी अधिक माहिती अशी की, गंगापूर तालुक्यातील कुसुमबाई शिंदे (६०, नाव बदलले आहे) ही ज्येष्ठ महिला गुरुवारी दुपारी ३ वाजेच्या सुमारास कांचनवाडीला नातेवाईकांना भेटण्यासाठी पायी निघाला होती. ए.एस.क्लबवरुन लिंकरोडकडे पायी जात असतांना काही अंतरावर लाल रंगाच्या दुचाकीवरुन आलेल्या दुचाकीस्वाराने कुसुमबाई यांच्याजवळ दुचाकी थांबवुन त्यांना कुठे जायचे आहे, असे विचारले. यावेळी कुसुमबाई यांनी त्या दुचाकीस्वाराची विचारपुस केली असता त्याने मी चौका ता.फुलंब्री येथील रहिवाशी असल्याचे सांगितले. दुचाकीस्वार मुला समान असल्याची खात्री पटल्यानंतर कुसुमबाई या त्याच्या दुचाकीवर पाठीमागे बसल्या. दरम्यान, काही अंतर पुढे गेल्यावर त्या दुचाकीस्वाराने शेताकडे दुचाकी वळविली असता घाबरलेल्या कुसुमबाई यांनी दुचाकीवरुन उडी मारली.
यावेळी दुचाकीस्वार तरुणाने मी या परिसरात बटाईने शेती करत असून शेतात पत्नी व इतर मजुर कापुस वेचनी करीत असल्याने त्यांना भेटुन तुम्हाला कांचनवाडीला सोडतो, अशी थाप मारली. मात्र घाबरलेल्या कसुमबाई यांनी दुचाकीवर बसण्यास नकार दिल्याने त्या दुचाकीस्वार भामट्याने झटापट करीत कुसुमबाई यांच्या गळ्यातील सोन्याचे दागिने हिस्कावत एका कानातील कर्णफुले ओरबाडुन घटनास्थळावरुन दुचाकीवरुन फरार झाला. अचानक घडलेल्या या प्रकारामुळे कुसुमबाई यांनी मदतीसाठी आरडा-ओरडा केल्याने लिंकरोडवरुन ये-जा करणाऱ्या एका वाहनधारकांने तिची मदत करीत पोलिस नियंत्रण कक्षावर संपर्क साधून या घटनेची माहिती दिली. या घटनेची माहिती मिळताच पोलिस निरीक्षक मधुकर सावंत, सहा.निरीक्षक गौतम वावळे, उपनिरीक्षक सतीश पंडीत, पोकॉ. विनोद परदेशी आदींनी ए.एस. ते लिंकरोडवर नाकाबंदी करुन भामट्याचा शोध घेतला मात्र भामटा मिळून आला नाही. या प्रकरणी एमआयडीसी वाळूज पोलिस ठाण्यात गुन्हा दाखल करण्याची प्रकिया सुरु असल्याचे सांगण्यात आले.