औरंगाबाद: वर्षभरापूर्वी लग्न झालेल्या गर्भवती विवाहितेने गळफास घेऊन आत्महत्या केल्याची घटना २५ डिसेंबर रोजी सकाळी ९ वाजेच्या सुमारास रेल्वेस्टेशन परिसरातील सादातनगर येथे घडली.
रुफेदा बेगम असलम बेग (वय १९, रा. सादातनगर) असे मयत महिलेचे नाव आहे. रुफेदा आणि असलम यांचा वर्षभरापूर्वी विवाह झाला. ती सहा महिन्यांची गर्भवती होती. अस्लम हा कॅनॉट प्लेसमध्ये मोबाईल शॉपीवर नोकरी करतो. आज सकाळी ७ वाजता तिने पतीला झोपेतून उठवले. मात्र, आज कामावर जायचे नाही, असे सांगून असलम झोपी गेला. नंतर रुफेदाने वरच्या मजल्यावरील स्टुल आणून बेडरुममधील पंख्याला ओढणी बांधून गळफास घेतला.सकाळी ८:३० ते ९ वाजेच्या सुमारास अस्लम झोपेतून उठल्यावर त्याला पत्नीने गळफास घेतल्याचे दिसले.
यावेळी त्याने आरडाओरड केल्यावर घरातील लोक त्यांच्या खोलीत गेले आणि त्यांनी ओढणी कापून रुफेदाला खाली उतरवले. यानंतर सातारा पोलीस आणि मयताच्या माहेरी फोेन करून घटनेची माहिती कळविण्यात आली. तिला बेशुद्धावस्थेत घाटी रुग्णालयात दाखल केले असता अपघात विभागाच्या डॉक्टरांनी तिला तपासून मयत घोषित केले. याप्रकरणी सातारा ठाण्यात आकस्मिक मृत्यूची नोंद करण्यात आली. रुफेदा हिचे काल गुरुवारी माहेरी बोलणे झाले होते. गर्भवती असल्यामुळे ती आनंदी होती. मात्र, तिने अचानक असा टोकाचा निर्णय का घेतला असा प्रश्न नातेवाईक आणि पोलिसांना पडला आहे.