औरंगाबादः शासकीय कर्करोग रुग्णालयातील एका डॉक्टर तरुणीने गळफास घेऊन आत्महत्या केल्याची घटना मंगळवारी ( दि. २५ ) रात्री १० वाजेच्या सुमारास उघडकीस आली. डॉ. सादाब शिरीन महंमद आरेफ (२८, रा. टाइम्स कॉलनी, कटकट गेट) असे आत्महत्या केलेल्या डॉक्टर तरुणीचे नाव आहे. धक्कादायक म्हणजे या तरुणीचे १३ मार्च रोजी लग्न होणार होते.
पॅथालॉजी विषयात एमडी असलेल्या डॉ. सादाब शिरीन या शहरातील शासकीय कर्करोग रुग्णालयात कार्यरत होत्या. त्यांचे १३ मार्च रोजी त्यांचा विवाह होणार होता. यासाठी कुटुंबीय तयार करत होते, नातेवाईकांना लग्न पत्रिका वाटण्याचे कामही सुरू होते. याच दरम्यान मंगळवारी रात्री डॉ. सादाब शिरीन यांनी ओढणीने खिडकीच्या अँगलला गळफास घेतला. रात्री दहाच्या सुमारास कुटुंबीयांच्या निदर्शनास हा प्रकार आला. त्यांनी लागलीच दरवाजा तोडून आत प्रवेश केला.
याची माहिती मिळताच रात्री जिन्सी पोलीस ठाण्याचे निरीक्षक व्यंकटेश केंद्रे, सहायक पोलीस निरीक्षक साईनाथ गिते यांनी कर्मचाऱ्यांसह धाव घेतली. त्यांनी डॉ. सादाब यांना बेशुध्दावस्थेत घाटी रुग्णालयात दाखल केले. मात्र, डॉक्टरांनी त्यांना तपासून मृत घोषित केले. त्यांच्या आत्महत्येचे कारण अद्याप स्पष्ट होऊ शकले नाही.