औरंगाबाद : बहिणीला ठार मारण्याची, तसेच तिचे नग्न फोटो काढून ते व्हायरल करण्याची धमकी देत शेंद्रा येथील तरुणाने एका २१ वर्षीय तरुणीवर सतत लैंगिक अत्याचार केले. याप्रकरणी अखेर तब्बल सव्वादोन वर्षांनंतर सिडको ठाण्यात गुन्हा करण्यात आला आहे.
सिडको एन-६ भागातील फिर्यादी व आरोपी शिवाजी आनंदा चौधरी (रा. शेंद्रा) हे एकमेकांचे नातेवाईक आहेत. सव्वादोन वर्षांपूर्वी आरोपी शिवाजीने फिर्यादी तरुणीला नांदेड जिल्ह्यातील मुखेड येथून औरंगाबादेत आणून सिडको येथील तिच्या बहिणीकडे सोडले. १३ मे २०१८ रोजी ही तरुणी तिच्या बहिणीसोबत गच्चीवर झोपलेली होती. त्यावेळी रात्री साडेबाराच्या सुमारास शिवाजीने तिला चाकूचा धाक दाखवून तिच्यावर लैंगिक अत्याचार केला. त्यावेळी त्याने तिचे नग्न फोटोही काढले.
या घटनेनंतर शिवाजीने तिचे फोटो व्हायरल करण्याची धमकी देत तिच्यावर विविध ठिकाणी लैंगिक अत्याचार केले. मोबाईलवर चॅटिंग करण्यास व नग्न फोटो पाठविण्यास तिला भाग पाडले. याप्रकरणी सुरुवातीला मुखेड ठाण्यात गुन्हा दाखल झाला. त्यानंतर हे प्रकरण एमआयडीसी सिडको पोलिसांकडे वर्ग झाले. आता पुन्हा हे प्रकरण सिडको पोलिसांकडे वर्ग करण्यात आले आहे.