गंगापूर ( छत्रपती संभाजीनगर) : अपघातात ठार झालेल्या हैदराबाद येथील मृत भाविकांच्या अंगावरील सोने चोरीप्रकरणी गुन्हा दाखल झाल्याच्या एक तासातच गंगापूर पोलिसांनी एका जणाला अटक केली. त्याच्या ताब्यातून चोरी गेलेले सोने हस्तगत करण्यात आले आहे. आकाश गुलाब साळवे (वय २२, रा. सखाराम पंतनगर) असे आरोपीचे नाव आहे.
हैदराबाद येथील १४ भाविक मंगळवारी शिर्डी येथे आले होते. दर्शन घेऊन ते बुधवारी सकाळी जीपमधून वेरूळ लेण्या पाहून गंगापूरमार्गे शिर्डीला जात असताना रात्री १० वाजेच्या सुमारास तांबूळगोटा फाटा येथे त्यांच्या जीपला भीषण अपघात झाला होता. या अपघातात एका लहान मुलासह तीन महिलांचा मृत्यू झाला होता. त्यामुळे गुरुवारी सकाळी मृतांचे नातेवाईक हे गंगापूर येथे आले असता, त्यांना मृतांच्या अंगावर असलेले २ लाख ७० हजार रुपयांचे सोन्याचे दागिने आढळून आले नाहीत. तसेच जखमीच्या खिशातील १३ हजार रुपयेही चोरी झाल्याचे दिसून आले. याप्रकरणी मनीकंठ रमेश श्यामशेट्टी यांच्या फिर्यादीवरून गंगापूर पोलिसांत गुन्हा दाखल झाला होता.
पोलिसांनी त्वरित तपासाची चक्रे फिरवून रुग्णालय परिसरातील सीसीटीव्ही व इतर तांत्रिक मदतीने संशयित आकाश साळवे यास ताब्यात घेत विचारपूस केली असता त्याने गुन्ह्याची कबुली दिली. पोलिसांनी त्याच्याकडून २ लाख ५० हजार रुपयांचे सोने हस्तगत केले आहे. मात्र लंपास २० हजारांची सोन्याची अंगठी व अपघातातील जखमी श्यामशेट्टीच्या खिशातील चोरलेल्या १३ हजार रुपयांचा अद्यापही तपास लागला नसून चोरीच्या घटनेत आणखीन इतर कोणी सामील आहेत का, याचा पोलिस तपास करीत आहेत.