मनपा शाळा होणार ई लर्निंग

नांदेड : महापालिकेच्या शाळेमध्ये ई लर्निंग शाळेचा महत्वकांक्षी प्रकल्प सुरू होणार असल्याने पुढील वर्षापासून विद्यार्थ्यांना पुस्तके, वह्या व दप्तरांचे ओझे आणण्याची गरज राहणार नाही़ शाळेतच संगणकावर त्यांना अभ्यास आणि गृहपाठ करता येईल़ मनपाच्या उर्दू शाळेसाठीही आवश्यक ते सॉफ्टवेअर उपलब्ध झाल्यास त्यांना देखील या सुविधेने जोडण्याचा प्रयत्न करण्यात येईल, अशी माहिती मनपा आयुक्त जी़ श्रीकांत यांनी सोमवारी दिली़ शाळेच्या पहिल्या दिवशी महापालिकेच्या शाळेतील विद्यार्थ्यांना मोफत पाठ्यपुस्तके, गणवेश वितरण आणि नवीन प्रवेश घेणाऱ्या विद्यार्थ्यांचे स्वागत करण्याचा कार्यक्रम जंगमवडी येथे आयोजित केला होता़ यावेळी ते बोलत होते़ कार्यक्रमास उपमहापौर आनंद चव्हाण, शिक्षण, महिला व बालकल्याण समिती सभापती इतरत फातेमा, उपसभापती पार्वती जिंदम, सदस्या अंजली गायकवाड, नगरसेवक किशोर भवरे, फारूख अली खान, गजानन लासिनकर, संतोष वडगे, नगरसेवक किशोर यादव, फारूख हुसेन, शिक्षणाधिकारी भागवत जोशी, गोविंद करवा, व्यंकटेश जिंदम, सय्यद शोएब यांची प्रमुख उपस्थिती होती़ जी़ श्रीकांत म्हणाले, मनपाच्या शाळेत विद्यार्थी जास्त आणि शिक्षक कमी असल्याने अतिरिक्त शिक्षकांचा प्रश्न नाही़ शासनास जिल्हा परिषदेच्या शाळा महापालिकेकडे हस्तांतरीत करावयाच्या असतील तर संपूर्ण मनुष्यबळ, व्यवस्थापनाचे पूर्ण नियंत्रण आणि इमारतीची मालकी महापालिकेकडे द्यावी़ वेतनाचा भार शासनाने उचलावा आणि देखभाल, दुरूस्ती महापालिकेकडे सोपवावी, असा प्रस्ताव लवकरच शासनाकडे पाठवला जाईल़ वजिराबाद येथील मनपा शाळेला खेळासाठी मैदान नाही़ याउलट जवळच्या मल्टीपर्पज शाळेत विद्यार्थी संख्या कमी व मैदान रिकामे पडून आहे़ या मैदानाचा मनपाच्या शाळेला उपयोग होऊ शकतो़ इतर खाजगी शाळांचया तुलनेत आम्ही पुढे नसलो तरी मागेदेखील निश्चितच नाही़ ६ ते १४ वयोगटातील कोणीही मुले परिस्थिती किंवा अन्य कारणामुळे बाहेर काम करताना दिसली तर त्याबाबतची माहिती शाळेच्या मुख्याध्यापकांना देऊन त्या मुलांना तुमच्या सोबत शाळेला आणा, असे आवाहन आयुक्तांनी सर्व विद्यार्थ्यांना केले़ (प्रतिनिधी)