औरंगाबाद : महावितरणने वीज ग्राहकांकडील मीटरचे रीडिंग अचूक होण्यासाठी कठोर उपाययोजना करण्यास सुरुवात केली आहे. यामध्ये चुकीचे मीटर रीडिंग घेऊन महावितरणच्या महसुलाचे नुकसान करणाऱ्या तसेच वीजबिल दुरुस्तीसाठी ग्राहकांना नाहक त्रास, मनस्ताप देणाऱ्या राज्यातील ६ मीटर रीडिंग एजन्सींना महावितरणकडून बडतर्फ करण्यात आले आहे. पुणे जिल्ह्यातील २ तसेच औरंगाबाद, वसई, नांदेड व अकोला येथील प्रत्येकी एक, अशा ६ मीटर रीडिंग एजन्सीवर बडतर्फीची कारवाई करण्यात आली असून, त्यांना काळ्या यादीत टाकण्याची प्रक्रिया देखील सुरू करण्यात आली आहे.
कोणत्याही परिस्थितीत प्रत्येक वीज मीटरचे रीडिंग १०० टक्के अचूक झालेच पाहिजे, असे निर्देश ऊर्जामंत्री नितीन राऊत यांनी दिले आहेत. त्या अनुषंगाने महावितरणचे अध्यक्ष व व्यवस्थापकीय संचालक विजय सिंघल यांनी १ फेब्रुवारीला राज्यभरातील मीटर रीडिंग एजन्सी मालकांसोबत व्हिडिओ कॉन्फरन्सिंगद्वारे संवाद साधला. एजन्सीने केलेल्या मीटर रीडिंगची पडताळणी महावितरणच्या अधिकारी व कर्मचाऱ्यांकडून सुरू करण्यात आली, अशी माहिती महावितरणतर्फे देण्यात आली.
या एजन्सी बडतर्फआतापर्यंत झालेल्या पडताळणीमध्ये बारामती परिमंडळातील परिमल एंटरप्रायजेस, पांडरे, ता. बारामती (सासवड विभाग) व गणेश एंटरप्रायजेस, सादलगाव ता. शिरूर (केडगाव विभाग), कल्याण परिमंडळातील सुप्रीम पॉवर सर्व्हिसेस, अंधेरी (वसई विभाग), नांदेड परिमंडळातील महाराष्ट्र इलेक्ट्रिकल, दहेली ता. किनवट (भोकर विभाग), औरंगाबाद परिमंडळातील नंदिनी एंटरप्रायजेस (औरंगाबाद शहर विभाग २) आणि अकोला परिमंडळामधील अजिंक्य महिला बहुउद्देशीय सुशिक्षित बेरोजगार सेवा सहकारी संस्था (अकोला शहर विभाग) या ६ एजन्सीद्वारे सुरू असलेल्या मीटर रीडिंगच्या कामात कुचराई होत असल्याचे आढळून आले. परिणामी, या एजन्सीविरुद्ध थेट बडतर्फीची कारवाई करण्यात आली असून, काळ्या यादीत टाकण्याची प्रक्रिया सुरू आहे.
चूक एजन्सीची, मनस्ताप ग्राहकांनाया बडतर्फ एजन्सीकडून वीज मीटरचे चुकीचे रीडिंग घेणे व फोटो अस्पष्ट असणे, रीडिंग न घेता आल्याचा हेतूपुरस्सर शेरा देणे, महावितरणला अचूक रीडिंग घेत असल्याची खोटी माहिती देणे आदी. प्रकार होत असल्याचे दिसून आले. यामुळे महावितरणच्या महसुली नुकसानीसोबतच वीज ग्राहकांना देखील चुकीच्या वीज बिलांच्या दुरुस्तीसाठी मनस्ताप व त्रास झाल्याचे दिसून आले. त्याची गांभीर्याने दखल घेत महावितरणकडून मीटर रीडिंग एजन्सीविरुद्ध कारवाई करण्यात आली आहे.