छत्रपती संभाजीनगर : सावंगी मठ पाटी समृद्धी महामार्गावर सर्कल गट नं. ६ मध्ये शेतात बिबट्याचे शनिवारी रात्री दर्शन झाले. चारचाकीतून जात असलेल्या राजू पिंपळे यांनी त्याचा व्हिडीओ रेकाॅर्ड केला असून, तो पुन्हा ’समृद्धी’च्या दिशेने निघून गेल्याचे सांगितले.
ही माहिती वन विभागाला दिल्यानंतर वन कर्मचारी घटनास्थळी आले. यावेळी शेजूळ यांच्या शेतवस्तीवरून चार बकऱ्या गायब असल्याचेही समजले आहे. कदाचित तो भुकेला असावा किंवा त्याच्या जोडीदाराच्या शोधात असावा, असा कयास धिरेंद्र पवार या शेतकऱ्याने व्यक्त केला.
’समृद्धी’वर वन्यजीवांना वाहनांची वर्दळ लक्षात घेता रस्ता ओलांडणे कठीण होते. दिवसभर याबाबत शहरात चर्चा सुरू होती. वन विभागाने बिबट्याचा शोध सुरू असल्याचे सांगितले.