मुकादमाकडून ऊसतोड मजुराच्या मुलाचे अपहरण

पाचोड : उचल घेऊनही मजूर ऊसतोडणीसाठी न आल्याने मुकादमांनी संगनमत करून ऊसतोड मजुराच्या अकरावर्षीय मुलाचे अपहरण केल्याचा प्रकार कुतूबखेडा येथे घडला; परंतु पोलिसांना माहिती मिळताच त्यांनी मुकादमाचा पाठलाग केल्याने कांबी (ता. शेवगाव, जि. अहमदनगर) येथे मुलाला सोडून मुकादम फरार झाल्याचे पोलिसांनी सांगितले. आकाश अण्णासाहेब नरवडे (११) असे अपहरण होऊन सुटका झालेल्या मुलाचे नाव आहे. मुकादम अशोक शिंदे (रा. कांबी, ता. शेवगाव), बाबासाहेब वडरी (दहाळा, ता. अंबड) व एक अनोळखी, अशी आरोपींची नावे आहेत. याबाबत पोलिसांनी सांगितले, आकाशचे वडील अण्णासाहेब छगन नरवडे यांनी भुईज सहकारी साखर कारखान, सातारा येथील तीन मुकादमांशी ऊसतोडणीचा करार केला होता. त्यांच्याकडून अण्णासाहेबने ३५ हजार रुपयांची उचल घेतली होती; मात्र ते या कराराप्रमाणे सातारा येथील कारखान्यावर ऊसतोडणीसाठी न जाता दुसऱ्याच कारखान्यावर गेले. दरम्यान, त्यांनी आपल्या मुलांना आई-वडिलांकडे ठेवले होते. ही माहिती मुकादमांना समजल्यावर ते कुतूबखेडा गावात आले. यावेळी अण्णासाहेब यांचे वडील छगन हे दहाव्याच्या कार्यक्रमासाठी पैठणला गेले होते. त्यांची आई शेतात काम करीत होती. मुलगा आकाश घरीच खेळता होता.