आष्टी : पोखरी गावाजवळ पिकअपच्या धडकेत दुचाकीवरील कानिफ भिमराव वांढरे ( ३८ ) हे जागीच ठार झाल्याची घटना शुक्रवारी रात्री ११ च्या सुमारास घडली आहे. यात दुचाकीवर असलेल्या त्यांची पत्नी पत्नी व मुलगी या गंभीर जखमी झाल्या आहेत.
याबाबत सविस्तर माहिती अशी की, तालुक्यातील पांढरी येथील कानिफ वांढरे यांचा पोखरी येथे कुकुटपालन व्यवसाय आहे. शुक्रवारी रात्री पत्नी सोनाली ( ३० ) आणि मुलगी संस्कृती ( ९) यांच्यासोबत दुचाकीवरून (क्रं. MH 23 AP 5180 ) ते गावाकडून पोखरी येथे जात होते. पोखरी गावाजवळ एका भरधाव पिकअपने ( क्रं. MH 14 V 9019 ) त्यांच्या दुचाकीला धडक दिली. यात कानिफ वांढरे जागीच ठार झाले.
घटनास्थळी ग्रामस्थ व नातेवाईकांनी धाव घेत गंभीर जखमी सोनाली वांढरे व संस्कृती वांढरे यांना उपचारासाठी अहमदनगर येथे दाखल केले. मृत कानिफ वांढरे यांच्यावर पांढरी गावी दुपारी २ वाजता अंत्यसंस्कार करण्यात येणार आहेत. आष्टी पोलिस घटनास्थळी दाखल झाले असून पंचनामा करण्याचे काम सुरू आहे. पुढील तपास सहाय्यक पोलिस उपनिरीक्षक सोनाजी हंबर्डे, पोका संजय गुजर हे करीत आहेत.