छत्रपती संभाजीनगरची लेक बॅ. अर्चना मेढेकर कॅनडात न्यायमूर्ती, महाराष्ट्रासाठी गौरवाची बाब!

छत्रपती संभाजीनगरचे माणिकचंद पहाडे लॉ कॉलेज ते कॅनडाचे न्यायालय; बॅ. अर्चना मेढेकरांचा थक्क करणारा प्रवास.

छत्रपती संभाजीनगर: जगाच्या पाठीवर मराठी माणसाने आपल्या कर्तृत्वाने अनेक शिखरे सर केली आहेत. यात आता छत्रपती संभाजीनगरच्या आणखी एका नावाचा समावेश झाला आहे. शहरातील माणिकचंद पहाडे लॉ कॉलेजची विद्यार्थिनी असलेल्या बॅ. अर्चना अरुण मेढेकर यांची कॅनडातील ओंटारियो प्रांतात (फोर्ट फ्रान्सिस/केनोरा) न्यायमूर्ती म्हणून नियुक्ती करण्यात आली आहे. या ऐतिहासिक निर्णयामुळे संपूर्ण महाराष्ट्रात आनंदाचे वातावरण आहे.

शिक्षण छत्रपती संभाजीनगरमध्ये, सराव कॅनडातन्यायमूर्ती अर्चना मेढेकर यांनी छत्रपती संभाजीनगर येथील प्रसिद्ध माणिकचंद पहाडे लॉ कॉलेजमधून कायद्याची पदवी प्राप्त केली. त्यानंतर त्यांनी यॉर्क विद्यापीठाच्या ओसगुड हॉल लॉ स्कूलमधून कायद्यात पदव्युत्तर पदवी (LLM) संपादन केली. २००४ मध्ये त्यांनी ओंटारियो बारमध्ये प्रवेश मिळवला आणि कुटुंब, कॉर्पोरेट व इमिग्रेशन कायद्यात स्वतःचा वेगळा ठसा उमटवला. २००८ मध्ये त्यांनी स्वतःची लॉ फर्म स्थापन केली.

सामाजिक बांधिलकी आणि दांडगा अनुभव न्यायमूर्ती मेढेकर यांनी केवळ वकिलीच केली नाही, तर ३५० हून अधिक तरुण क्लायंटचे प्रतिनिधित्व करत त्यांना न्याय मिळवून दिला. 'मुलांचे वकील कार्यालय' (OCL) आणि 'संयुक्त राष्ट्रांच्या मेडिएटर्स बियॉन्ड बॉर्डर्स' यांसारख्या संस्थांसोबत त्यांनी उल्लेखनीय काम केले आहे. त्यांच्या या कार्याची दखल घेत कॅनडा सरकारने त्यांना 'टॉप २५ कॅनेडियन इमिग्रंट्स' पुरस्कारानेही सन्मानित केले आहे.

 

विद्यार्थ्यांसाठी प्रेरणास्थान त्या केवळ एक कायदेतज्ज्ञ नसून यॉर्क विद्यापीठ आणि ग्वेल्फ-हंबर विद्यापीठात त्या अध्यापनाचे कार्यही करतात. कायद्याच्या क्षेत्रातील तज्ज्ञ म्हणून त्यांची ओळख संपूर्ण कॅनडात आहे. कॅनडाच्या मुख्य न्यायाधीश शेरोन निकलस यांनी त्यांची नियुक्ती केल्यामुळे, आता त्या फोर्ट फ्रान्सिस आणि केनोरा येथील न्यायालयात न्यायदानाचे कार्य करतील. एका मराठमोळ्या महिलेने परदेशातील न्यायव्यवस्थेत इतके मानाचे स्थान मिळवणे, ही सर्वांसाठीच अभिमानाची बाब ठरली आहे.