घाटीत कच-याचा डोंगर

घाटीत मूत्रपिंड विकार व मूत्रपिंडरोपण विभागाच्या परिसरात कच-याचे ढीग साचले आहेत.

लोकमत न्यूज नेटवर्कऔरंगाबाद : महापालिकेच्या दुर्लक्षामुळे घाटी रुग्णालयात कचरा डेपो तयार झाला आहे. घाटी प्रशासनाने वारंवार विनंती करूनही चार दिवसांपासून कचरा उचलण्यासाठी महापालिकेचा ट्रक घाटीत फिरकला नाही. त्यामुळे मूत्रपिंड विकार व मूत्रपिंडरोपण विभागाच्या परिसरात कच-याचे ढीग साचले आहेत.नारेगाव येथील कचरा डेपो हटविण्याच्या मागणीसाठी १३ गावांतील नागरिकांनी एकत्र येऊन शुक्रवारपासून आंदोलन उभारले. त्यामुळे महापालिकेची कचरा कोंडी झाली आहे.घाटी रुग्णालयात कच-याचा प्रश्न तीव्र झाला आहे. १० आॅक्टोबरपासून येथील कचरा उचलण्यात आलेला नाही. गेली काही महिने उघड्यावर पडून राहणा-या कच-याच्या समस्येवर नियंत्रण आलेले असताना पुन्हा एकदा मूत्रपिंड विकार व मूत्रपिंडरोपण विभागाच्या बाजूला कच-याचा ढीग पडून आहे. काळ्या, निळ्या पिशव्यांबरोबर लाल पिशव्यांमध्ये संकलित केलेला कचरा याठिकाणी पडून आहे. त्यामुळे रुग्णांचे आरोग्य धोक्यात येत आहे. घाटीतील विविध विभाग, वॉर्डात निर्माण होणारा कचरा मूत्रपिंड विकार व मूत्रपिंडरोपण विभागाच्या आवारात साठविण्यात येतो. हा कचरा महापालिकेच्या वाहनांद्वारे उचलण्यात येतो; परंतु सध्या कचरा उचलणे ठप्प आहे. त्यामुळे कच-यामुळे रुग्ण आणि रुग्णांच्या नातेवाईकांना प्रचंड दुर्गंधीचा त्रास सहन करावा लागत आहे.दोन पत्र दिलेघाटीत १० आॅक्टोबरपासून महापालिकेची गाडी कचरा उचलण्यासाठी आलेली नाही. त्यासंदर्भात दोन पत्र पाठविले. शिवाय मी स्वत: दोन-तीन वेळा महापालिकेत फोन केल्याचे घाटीचे वैद्यकीय अधीक्षक डॉ. भारत सोनवणे यांनी सांगितले.