वाळूज महानगर : एका माथेफिरू तरुणाने धारदार शस्त्राने पाच जणांवर प्राणघातक हल्ला केल्याची घटना रविवारी रात्री रांजणगाव येथे घडली. या घटनेत तीन जण गंभीर जखमी झाले असून, एकाची प्रकृती चिंताजनक आहे. वैभव बालाजी बिराजदार (रा. शिवशंभू हौ.सो., बजाजनगर), असे हल्ला करणाऱ्या माथेफिरूचे नाव आहे.
वैभव बालाजी बिराजदार या माथेफिरूने रविवारी रात्री साडेआठ वाजेच्या सुमारास रांजणगाव फाट्यालगत असलेल्या एटीएमजवळ रस्त्यावर उभ्या असलेल्या अनिल गवारे (२५, रा. कमळापूर फाटा रांजणगाव), नारायण दळवी, शंकर सराजे, शरद दळवी व गजानन कड यांच्यावर अचानक धारदार शस्त्राने प्राणघातक हल्ला केला. यात अनिल गवारे याच्या पोटात, शरद दळवी याच्या दोन्ही हातावर तर गजानन कड याच्या पायावर घाव मारल्याने तिघेही गंभीर जखमी झाले आहेत. यातील अनिल गवारे याची प्रकृती चिंताजनक आहे,
तसेच नारायण व शंकर हे दोघेही या हल्ल्यात किरकोळ जखमी झाले आहेत. विशेष म्हणजे हल्लेखोर बिराजदार हाही यात जखमी झाला आहे. घटनेची माहिती मिळताच पोलिसांनी जखमींना शासकीय रुग्णालयात दाखल केले. हल्ल्याचे कारण समजू शकले नाही. दरम्यान, फॉरेन्सिक लॅबच्या पथकाने घटनास्थळावरील विविध वस्तूंचे नमुने गोळा केले आहेत. याप्रकरणी वाळूज एमआयडीसी पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.