व्हॉटस्अ‍ॅप चर्चेतून चक्क ग्रंथनिर्मिती

सोशल मीडिया म्हटले की, वेळ वाया घालविण्याचे ठिकाण, तथ्यहीन चर्चा, वाद-विवादांचा कट्टा. या आभासी जगात काही नावीन्यपूर्ण उपक्रम होण्याची शक्यताही दुरापास्त बनलेली असते. या प्रभावी माध्यमाचा कोणी सकारात्मक वापर करील, असे उदाहरणही सापडणे दुरापास्त. मात्र होय, सकारात्मक वापर केला. त्यातून झालेल्या मंथनाचा ग्रंथही तयार झाला. एवढेच नाहीतर त्याचे प्रकाशनही मुंबईतील यशवंतराव चव्हाण प्रतिष्ठानतर्फे झाले आहे.

राम शिनगारे ।लोकमत न्यूज नेटवर्कऔरंगाबाद : सोशल मीडिया म्हटले की, वेळ वाया घालविण्याचे ठिकाण, तथ्यहीन चर्चा, वाद-विवादांचा कट्टा. या आभासी जगात काही नावीन्यपूर्ण उपक्रम होण्याची शक्यताही दुरापास्त बनलेली असते. या प्रभावी माध्यमाचा कोणी सकारात्मक वापर करील, असे उदाहरणही सापडणे दुरापास्त. मात्र होय, सकारात्मक वापर केला. त्यातून झालेल्या मंथनाचा ग्रंथही तयार झाला. एवढेच नाहीतर त्याचे प्रकाशनही मुंबईतील यशवंतराव चव्हाण प्रतिष्ठानतर्फे झाले आहे.सोशल मीडियातील विविध माध्यमांचा वापर करताना अनेक सुज्ञ नागरिक, अधिकारी, पदाधिकारी सजग असतात. अनेकजण तर यापासून दूर राहणेच पसंत करतात. बहुतांश वेळा सोशल मीडियाचा वापर कोणाची तरी बदनामी, खोटी माहिती पसरविणे, गुडमॉर्निंग, गुडनाईट, हाय, बाय अशा गोष्टींसाठीच सर्वाधिक केला जातो. यातून वाद-विवाद, दंगली घडल्याचे प्रकारही राज्याच्या विविध भागात घडले आहेत. मात्र सोशल मीडियाचाही सकारात्मक उपयोग होऊ शकतो. व्हॉटस्अ‍ॅपचा एक ग्रुप बनवून त्यावर झालेल्या मंथनाचा ग्रंथही निर्माण होऊ शकतो, असे कोणी बोलले, तर त्याला वेड्यात काढले जाईल. हे काय शक्य आहे का? असेही आपण म्हणू शकतो. पण हे सत्यात उतरले आहे. मुंबईतील यशवंतराव चव्हाण प्रतिष्ठानतर्फे विविध उपक्रम राबविण्यात येतात. प्रतिष्ठानचा एक ग्रुप शिक्षणावर काम करतो. यातूनच सेवानिवृत्त शिक्षण संचालक डॉ. वसंत काळपांडे, माध्यमिक व उच्च माध्यमिक विभागीय शिक्षण मंडळाच्या माजी सचिव बसंती रॉय आणि माधव सूर्यवंशी यांनी ‘शिक्षण विकास मंच’ या व्हॉटस्अ‍ॅप ग्रुपची स्थापना २ आॅक्टोबर २०१५ रोजी गांधी जयंतीच्या मुहूर्तावर केली. तेव्हा ग्रुपमध्ये केवळ १०० सदस्यांना सहभागी करून घेता येऊ शकत होते. यामुळे याच नावाचे तीन ग्रुप केले. पुढे एका ग्रुपमध्ये २५६ जणांची मर्यादा झाली. यातून सर्वांचे एकत्रीकरण करण्यात आले. सुरुवातीला अनेक सदस्य अनावश्यक गोष्टी फॉरवर्ड करीत होते. मात्र, सर्वांना योग्य तो संदेश देत, काही वेळा ग्रुपमधून रिमूह करत हे प्रमाण कमी केले. पुढे राज्यातील शिक्षणाच्या प्रश्नांवर गंभीरपणे चर्चा होऊ लागली. ज्यांना आवड आहे ते त्यात हिरीरीने सहभागी होत होते. यातूनच सकारात्मक चर्चा होऊ लागल्या. या सर्व चर्चा सेव्ह केल्या. यातूनच आॅक्टोबर-२०१६ ते सप्टेंबर- २०१७ या वर्षभरातील सकस चर्चेचे पुस्तक तयार झाले आहे.मात्र या कालावधीत झालेल्या चर्चेतून तब्बल १२ हजार पानांच्या ग्रंथांची निर्मिती होऊ शकत होती. मात्र ग्रंथासाठी पृष्ठसंख्या मर्यादित ठेवणे आवश्यक होते. यातून काही निवडक चर्चेलाच प्राधान्य देत २२४ पानांचा ग्रंथ यशवंतराव चव्हाण प्रतिष्ठानने प्रकाशित केल्याची माहिती मुख्य संयोजक शिक्षणतज्ज्ञ डॉ. वसंत काळपांडे यांनी ‘लोकमत’शी बोलताना दिली.