औरंगाबाद : डॉ. बाबासाहेब आंबेडकर मराठवाडा विद्यापीठाच्या पदवी अभ्यासक्रमाच्या परीक्षा (द्वितीय व तृतीय वर्षाच्या ) नियोजित वेळापत्रकानुसार १६ मार्चपासूनच सुरू होणार आहेत. कोविडच्या पार्श्वभूमीवर प्रशासनाने दिलेल्या कोरोना प्रतिबंधाच्या सूचनांचे काटेकोरपणे पालन करून परीक्षा घ्याव्यात, असे आदेश कुलगुरू डॉ. प्रमोद येवले यांनी बुधवारी दिले.
औरंगाबाद शहर व जिल्ह्यात ११ मार्च ते ४ एप्रिल या काळात जिल्हा प्रशासनाने अंशतः लॉकडाऊन जाहीर केला आहे. त्यानुसार जिल्हा आपत्ती व्यवस्थापन प्राधिकरण तसेच जिल्हा प्रशासन यांनी यासंदर्भात घ्यावयाची काळजी व सर्व सूचना काटेकोरपणे पाळण्याचे आदेश विद्यापीठाने संबंधित सर्व केंद्र व महाविद्यालयातील दिले आहेत. प्रथम वर्ष सोडून विद्यापीठाच्या उर्वरित वर्गाच्या पदवी अभ्यासक्रमांच्या परीक्षा १६ मार्चपासून होणार आहेत. विद्यार्थ्यांना ऑनलाईन व ऑफलाईन दोन्ही पर्याय उपलब्ध करुन देण्याचा तसेच एखादा विद्यार्थी आजारी आढळल्यास त्याची वेगळी बैठक व्यवस्था करण्याच्या सूचना प्रशासनाने दिल्या आहेत.
ऑफलाईनसाठी होम सेंटरया काळात औरंगाबादसह चारही जिल्ह्यांतील परीक्षा नियोजित वेळापत्रकानुसारच होणार आहे. तथापि, या काळातील सर्व शनिवार-रविवारी विद्यापीठ परीक्षाचे पेपर ठेवण्यात आलेले नाहीत. यासंदर्भातील परिपत्रक आज जारी करण्यात आले आहे. ऑनलाइन परीक्षेचा पर्याय निवडलेल्या विद्यार्थ्यांना ११ ते १४ मार्चदरम्यान ऑनलाईन मॉक टेस्ट देता येणार आहे. ऑनलाईन पर्याय निवडलेल्यांना ही टेस्ट देणे गरजेचे आहे. ऑफलाईन विद्यार्थ्यांना स्वत:चे महाविद्यालय हेच ‘होम सेंटर‘ असणार आहे. प्रथम वर्ष पदवी अभ्यासक्रमाच्या परीक्षा मात्र पदव्युत्तर अभ्यासक्रम परीक्षेसोबतच १ एप्रिलपासून होणार आहेत, अशी माहिती परीक्षा व मूल्यमापन मंडळाचे संचालक डॉ.योगेश पाटील यांनी दिली.