औरंगाबाद: तोंडास रुमाल बांधून आलेल्या तीन ते चार जणांनी चाकूने भोसकून एका व्यापाऱ्याची हत्या केल्याची घटना शुक्रवारी शहरातील नगरखाना गल्ली भागात घडली. कमलेशभाई पटेल उर्फ प्रकाशभाई पटेल (रा .नगारखाना गल्ली ) असे मृत व्यापाऱ्याचे नाव आहे. भरवस्तीत दिवसा ढवळ्या झालेल्या या हत्येने शहरात खळबळ उडाली आहे.
पटेल हे आजच गुजरातहून औरंगाबादेत आले होते. नगारखाना भागात त्यांचा कुरियर व्यवसाय होता. शुक्रवारी दुपारी पटेल यांच्या कुरियर ऑफिसमध्ये तोंडाला कपडा बांधलेली तीन हल्लेखोर घुसली. यातील एका हल्लेखोरांने रिव्होल्व्हर रोखताच पटेल यांनी तेथून पळण्याचा प्रयत्न केला. यानंतर हल्लेखोरांनी पटेल यांना पकडून त्यांच्यावर चाकूने वार केले. छातीवर गंभीर स्वरुपाची वार झाल्याने पटेल रक्ताच्या थारोळ्यात जागीच कोसळले. यानंतर हल्लेखोरांनी तेथून पळ काढला. यावेळी पटेल रक्तबंबाळ अवस्थेतच जवळील नातेवाईकाच्या दुकानात गेले आणि तेथेच कोसळले. यानंतर त्यांना दिनेश पटेल यांनी घाटी रुग्णालयात दाखल केले तोपर्यंत त्यांचा मृत्यू झाला होता. दरम्यान, सर्व आरोपी एका गल्लीतून पळून गेले.
घटनेची माहिती मिळताच पोलिसांनी घटनास्थळी धाव घेतली असून पुढील तपास सुरु आहे. हल्लेखोर एकाच दुचाकीवर जाताना सीसीटीव्ही कॅमेऱ्यामध्ये कैद झाले असून पोलिसांनी याच्या आधारे तपास सुरु केला आहे. लूट मारीच्या उद्देशाने अथवा हवाला व्यवहारातून ही हत्या झाली असावी असा संशय व्यक्त केला जात आहे.