छत्रपती संभाजीनगर : बंदुकीच्या छायाचित्रासह भाऊ दादांनी वाढदिवसासाठी भर चौकात बॅनरबाजी केल्याचा धक्कादायक प्रकार समोर आला आहे. जवाहरनगर पोलिसांनी यात बॅनर काढून स्वयंघोषित भाऊ संतोष ज्ञानेश्वर थोरात (रा. वाघलगाव, फुलंब्री ) आणि माया उर्फ प्रशांत सासवडे ( रा. विजयचौक, गारखेडा) याच्यावर गुन्हा दाखल करण्यात आला.
शुक्रवारी सकाळीच गजानन महाराज चौकात असेच एका स्वयंघोषित भाऊ, दादांचे बॅनर उभे राहिले. या बॅनरवर शिंदेसेनेच्या दोन नेत्यांची छायाचित्र लावून खाली मायाभाई वाढदिवसाच्या शुभेच्छा, असा मजकूर लिहिला. संतोष यात शुभेच्छुक होता. परंतु यावर हातात बंदूक घेतल्याचे छायाचित्र पाहून अनेकांना धक्काच बसला. भर चौकातील या बॅनरबाजीची माहिती मिळताच जवाहरनगरचे निरीक्षक व्यंकटेश केंद्रे यांनी अधिकाऱ्यांना पाठवले. त्यानंतर बॅनर काढून संतोष व प्रशांतवर गुन्हा दाखल करण्यात आला. त्यानंतर दोघांना पोलिसांनी ताब्यात घेत ठाण्यात त्यांची रात्री उशिरापर्यंत चौकशी सुरू होती.