औरंगाबाद : पोलिसांच्या रेकॉर्डवरील अट्टल गुन्हेगार व हद्दपार केलेला टिप्या ऊर्फ शेख जावेद शेख मकसूद (२६, रा. विजयनगर चौक) याला गावठी कट्टा आणि दोन काडतुसांसह पुंडलिकनगर पोलिसांनी सिडको एन-३ मधील अजयदीप कॉम्प्लेक्सजवळ रविवारी पकडले.
याविषयी पोलिसांनी सांगितले की, कुख्यात टिप्या ऊर्फ शेख जावेद हा पोलिसांच्या रेकॉर्डवरील अट्टल गुन्हेगार आहे. त्याच्याविरोधात मुकुंदवाडी आणि पुंडलिकनगर ठाण्यात गंभीर स्वरूपाचे नऊ गुन्हे दाखल आहेत. २०१८ मध्ये टिप्याला एक वर्षासाठी शहरातून हद्दपार करण्यात आले होते. मात्र, त्याचा टिप्यावर कोणताही परिणाम झाला नाही.
दरम्यान, रविवारी सकाळी टिप्या हा गावठी कट्टा आणि काडतुसासह सिडको एन-३ मधील एका शॉपिंग कॉम्प्लेक्सजवळ बसला असल्याची माहिती खबऱ्याने सहायक पोलीस निरीक्षक घनश्याम सोनवणे यांना दिली.
माहिती मिळताच पोलीस उपायुक्त डॉ. राहुल खाडे यांच्या मार्गदर्शनाखाली सपोनि. सोनवणे, उपनिरीक्षक विकास खटके, कर्मचारी रमेश सांगळे, मच्छिंद्र शेळके, बाळाराम चौरे, प्रवीण मुळे, राजेश यदमळ, रवी जाधव, जालिंदर मांटे, दीपक जाधव, शिवाजी गायकवाड आणि विलास डोईफोडे यांनी सापळा रचून टिप्याला पकडले.
यावेळी अंगझडतीत त्याच्याजवळ गावठी कट्टा आणि दोन काडतुसे मिळाली. टिप्याविरोधात पुंडलिकनगर ठाण्यात गुन्हा नोंदविण्यात आला.